नयाँ वर्षको शुभकामना
मान्छे बन्न सकून् सदैव विजयी दुर्धर्ष सङ्घर्षमा
होस् सङ्घर्ष तथापि जीवन पुगोस् चूडान्तमा हर्षमा
यात्री पुग्न सकून् सरासर हिँडी गन्तव्य उत्कर्षमा
हामी सिर्जनहीन बन्नु नपरोस् भावी नयाँ वर्षमा ।
त्यो भूकम्प थतर्किएर नपसोस् बस्ती, गृहस्थीतिर
दैत्याकार बनी कदापि नउठोस् आतङ्ककारी शिर
मान्छे मानव–कर्म निम्ति खटिऊन् टाढा लघारी पिर
मर्यादा नभुलेर मानिस पुगून् उद्देश्यमा आखिर ।
पारी चित्त धुजा धुजा अझ गरी अस्तित्वकै भक्षण
बाँच्ला खै जनजिन्दगी र कसरी होस् राष्ट्रको रक्षण !
नाका बन्द भएर लड्नु नपरोस् आफन्तघाती रण
आफ्नै भाइ कुटेर हर्षित हुने बानी छुटोस् तत्क्षण ।
काठमाडौं