नेपाली हास्यव्यङ्ग्य अनलाइन पत्रिका

हे बिजुली मैयाँ । हे विद्युत शक्ति । हे म्याडम इलेक्ट्रिसिटी पहिले हजुर मेरो नमस्कार लिनोस् । आज अन्धकारमा डुबेको हजुरको यो प्रशंसक हजुरको शरणमा आएको छु । बुद्धिहीन छु, लण्ठ छु, बाकपटुता पनि त्यस्तो खास ममा छैन । लाटो बुद्धिले म जे जे तेते पेपे भन्दछु, त्यसैलाई हजुरले हजुरको स्तुति सम्झनु भई प्रसन्न भइदिनुहो्स र छमछम गर्दै आउनुभई मेरो अन्धकारपूर्ण घर, चोटा, कोठा आँगन सबै झलमल्ल तुल्याइदिनोस् । जलश्रोतको धनी नेपाल अधिराज्यकी हे महिमामयी विद्युत शक्ति । हजुरको मायाँ सेवा महिमाको वर्णन गर्न विद्युतका बढेबढे अभियन्ताहरूलाई त आच्छुआच्छु पर्दछ भने म लण्ठ त के हुँ र । त्यसैले हजुरका सम्बन्धमा जे जति जान्दछु त्यति नै म कनीकुथी भन्छु । मेरो यसै कनाइलाई नै हजुरले हजुरको प्रशंसाको वृहत् स्तोत्र सम्झिदिनुभई प्रशन्न भइदिनोस् र मेरो अन्धकारपूर्ण घरलाई छमछम गर्दै आएर झलमmलाकार तुल्याई दिनुहोस् ।
हे बिजुली मैयाँ, हे विद्युत शक्ति, हे म्याडम इलेक्ट्रिसिटी । को हो यो राँडीको छोरो “लोडसेडिङ” नामको साइँदुवा ? हजुर किन सारा देशवासीलाई अन्धकारमा डुबाएर त्यसँग यसरी रिझिनु भयो ? घरबाट नित्य घरिघरि गायब भई सारालाई अन्धकारमा राखेर त्यस साइँदुबासँग केली क्रीडाका लागि अलप हुने हजुरको बानीले गर्दा सारा घरमा फ्रिज चल्न छोडे, रेडियो र टेलिभिजन समेतले पनि मुख मोडे । कुकिङ्ग रेन्ज हिटर, रारा सटक सीताराम ! र बत्ती नै पनि सब हाराम ! भए ’ लोडसेडिङसँगको हजुरको अनैतिक सम्बन्धले गर्दा देशभरका कलकारखानामा लाटोकोसेरा बास्न थाल्यो र गाडिएको स्वेच्छाचारी पञ्चायती व्यवस्थाको लाश समेत पनि काखी बजाईबजाई प्रसन्न भई चिहानमै हाँस्न थाल्यो ।
यस देशमा हजुरको जन्म चन्द्र शम्शेरको पालामा राणाकालमा भएथ्यो र प्रवस्ति पञ्चायतकालमा । त्यसैले मलाई लाग्दछ हजुरको अन्तर मनमा कताकता पारिवारिक राणा शासन र स्वेच्छाचारी पञ्चायती शासनप्रति माया छ, मोह छ र प्रजातन्त्रप्रति द्वेष छ, घृणा छ । होइन भने साइँदुवा लोडसेडिङसँग एक दिन बिराई प्रेमालाप गर्न जाने तपाईं नेपाली काङ्ग्रेसका सभापति कृष्णप्रसाद भट्टराईले काठमाडौं क्षेत्र नं. १ बाट चुनाव लड्ने निर्णय गर्नासाथ बिहान बेलुका दिउँसो गरी दिनको तीनतीन पटक किन गायब हुनुपर्थ्यो ? तपाईं यो कार्य सारा मतदातालाई अन्धकारमा डुबाएर प्रजतन्त्रप्रति वितृष्णा पैदा गराउनु होइन र ?
मानो प्रभो ! मानो हजुर आफ्नो रतिरागजन्य पीडा बढाएर जनतालाई बढी भन्दा बढी समयसम्म अन्धकारमा डुबाएर प्रजातन्त्रप्रति नै तिनमा वितृष्णा पैदा गराई प्रजातन्त्रलाई नै यस देशमाबाट पुनः डाँडो कटाइदिन चाहनुहुन्छ । तर हे बिजुली मैयाँ ! तपार्इंको यो दूरभि सन्धि पूरा हुन गाहारै पर्ला । किनभने यस किसिमको दुरभिसन्धि तपाईंले पहिले पनि नगरेको कहाँ हो र । मलाई अझै पनि राम्रै सम्झना छ । त्यस्तै २०१०।११ सालतिरको कुरा हो । तिनताक पनि मेरो घर यसै पुतलीसडकमा थियो । तिनताक यस सडकमा तपाईं १२० भोल्टमा आउनुहुन्थ्यो । तर पनि तिनताक नै पनि तपाईले हामी यस क्षेत्रका बासिन्दालाई दुःख नै दिनुभएको थियो । तिनताकासम्म संभवतः त्यस साइँदुवा लोडसेडिङसँग तपाईंको परिचय नै भएको थिएन । त्यसैले तपाईं केली क्रीडाका लागि त्यस बज्जियासँग जाने त कुरै भएन । तर पनि बदमासी चाहिँ तपाईं कसरी गर्न थाल्नुभयो त भने १२० भोल्ट आउनु पर्नेमा जम्माजम्मी २५ भोल्ट मात्र आउन थाल्नुभयो । त्यस दिन मजाको कुरा के भयो त भने राती ८/९ बजेतिर पढ्न बसेकी मेरी छोरीले तपाईंको जुनकीरी प्रकाशमा अक्षर ठम्याउन नसकेर तपाईं आए नआएको जाँच्न टर्च बालेर चिमतिर हेरी । धेरै वर्षसम्म तपाईंको यो बदमासी चलिरहेथ्यो । अन्तमा २०१५ सालमा आएका जननिर्वाचित सरकारले पनौती र त्रिशुली योजनाको कार्यान्वयन गराएर तपाईंलाई तह लगाएथ्यो । तर के गर्ने र देशमा पुनः जननिर्वाचित सरकार आउनासाथ साइँदुवा लोडसेडिङ्गसँग आँखा झिम्क्याउँदै देशलाई नै अन्धकारमा डुबाएर फेरि बदमासी गर्न थालिहाल्नु भयो ।
त्यसैले म भन्दछु हे बिजुली मैयाँ ! हे विद्युत शक्ति । हे म्याडम इलेक्ट्रिसिटी ! यत्रो जलश्रोतको धनी देशको इज्जत तपाईं त्यो पाजी लोडसेडिङको अनुचित प्रेममा फसेर नगुमाइदिनोस् । सदा यसरी देशलाई अन्धकारमा नडुबाई दिनोस् । कुलेखानी पनि चालू गर्नोस् र देशलाई झलमल्ल तुल्याई दिनोस् । अरुण तेस्रो आउँदैछ । त्यसले त्यस साईदुवा लोडसेडिङको हत्या नै गरिदिने छ । त्यसैले बेलैमा समालिनोस् र त्यस साइँदुवालाई त्यागेर देश र देशवासीको सेवा गर्न थाल्नोस् ।

‘विमर्श’ बाट