नेपाली हास्यव्यङ्ग्य अनलाइन पत्रिका

उमेरले दौँतरी, बसाइले छिमेकी, पढाइले सहपाठी भएपछि नालीबेली थाहै छ । बिहे गर्ने रहर गरे, केटी माग्ने बेलामा जाऊँ भनेपछि नाइँ भन्न सकिएन, गइयो । भलाकुसारी र औपचारिकता आफ्नै खालका भए । अब सोधखोजको पालो आयो ।

केटीका बा— भविष्यमा के गर्ने ?
केटो— देशसेवा ।
केटीका बा— पढाइ कति छ ?
केटो— राम्रै डिग्री ।
केटीका बा— धनसम्पत्ति ?
केटो— निकै नै ।
केटीका बा— खैनीचुरोट ?
केटो— खान्नँ ।
केटीका बा— तासजुवा ?
केटो— खेल्दिनँ ।
केटीका बा— अरु केही विशेष योग्यता ?
केटो— एउटा मात्रै छ ।
केटीका बा— के हो त्यो ?
केटो— झुटो बोल्ने ।

बिहेको जन्तेबाख्रो खुवाएपछि उनी राजनीतिमा लागे । अहिले पार्टीको ठूलै नेता बनेर भोट माग्दै घरदैलो आउँदै छन् । हामी उसबेला पनि सहयोगी आज पनि सहयोगी ।

काठमाडौं