नेपाली हास्यव्यङ्ग्य अनलाइन पत्रिका

नारायण नेपाल :

१.
नखर्माउलीको दशा तेल घस्छ !
बनी सर्प मानौँ कतै भित्र डस्छ !
त्यसै छक्क पर्ने अवस्था छ मेरो
चुमेको कहाँ हो कता डाम बस्छ !?

२.
हरियालीपूर्ण बारीछेउ गाईको गोठ कति राम्रो देखिने !
सभ्यताको आँगनमा तुलसीको मोठ कति राम्रो देखिने !!
आफ्नो नजर त्यस्तो हो वा नजारा कमाल परेर हो
फूलको बोट अनि मायालुको ओठ कति राम्रो देखिने !!?

३.
सुन्छु ऊ रोर्याइँ गरेकै भरमा मिठोमसिनो खान्छ !
बुझ्दैन अरे यहाँ धान्नेले घर-व्यवहार कसरी धान्छ !
दङ्ग्याएर बस्या खाइदेउलाई जागिर खोज्न भन्नुहुन्छ तपाईं,
सित्तैमा टन्न खान पाएपछि कोही किन काम गर्नजान्छ !?

४.
आफैँले आफूलाई ढाँटेर बस्नुको मजा बेग्लै हुन्छ अरे !
जथाभावी कुरा काटेर बस्नुको मजा बेग्लै हुन्छ अरे !
कतिपय कुरौटेहरू यो पनि भन्छन् कि, हजुर,
कुरैकुरा माया साटेर बस्नुको मजा बेग्लै हुन्छ अरे !

५.
वर्तमानकि कसैसित मौका पारी लस्किन्छु,
बनावटी नै सही इत्रिन्छु अनि मस्किन्छु,
मायालु भनेर मात्रै नहुने रहेछ, साथी हो,
भूपू सम्झियो कि वर्तमानसित झस्किन्छु !

०००
चतरा, सुनसरी
हालः बौद्ध – ६, काठमाडौं