नेपाली हास्यव्यङ्ग्य अनलाइन पत्रिका

आश्विन ३, मकवानपुर । कुनै समय साहित्य सङ्गम मकवानपुरले नियमित सन्ध्या सञ्चालन, एकल तथा संयुक्त वाचन, पुस्तक विमर्श लगायतका कार्यका लागि सँधै दाताहरूकै हात थापिरहनु पर्थ्यो । सङ्गमका अग्रीम तोकिएका यस्ता कार्य सञ्चालनका लागि अक्षयकोष स्थापना गरेर प्राप्त व्याजबाट सञ्चालन गर्न सकिने सम्भावना हुँदै गएको छ ।

कार्यसमितिका सदस्यहरू एकस्वरमा भनिरहनु भएको छ, यो कार्य अध्यक्षज्यूको ठूलो प्रयासले अघि बढिरहेको हो । उता अध्यक्षलाई सम्पर्क गर्दा उहाँ भन्नुहुन्छ, “साथीहरूको सहयोगले मात्रै यो काम सम्भव भैरहेको हो ।“ जेहोस्, साथमा साथ मिलिरहेको छ । हेटौँडाभित्रबाट आइरहेको सहयोग जिल्ला हुँदै जिल्ला बाहिर मात्रै होइन नेपालका विभिन्न साहित्य सर्जक र साहित्यलाई माया गर्नेहरूको नजरमा परिसकेको छ ।

हालसालै नयाँ कार्य समिति चयन भएपछि अध्यक्ष डीबी बर्तौलाको नेतृत्वमा संस्थाको नियमित कार्यक्रमको दिगोपनाका लागि विभिन्न व्यक्तिहरूबाट आर्थिक सहयोग प्राप्त हुने क्रम वृद्धि भइरहेको छ ।

अध्यक्ष डीबी बर्तौला, उपाध्यक्ष सानु खनाल, सचिव मनोज पोखरेलबाट ५/५ हजार गरी १५ हजार र सदस्य कुबेर पराजुलीबाट २ हजार गरी सुरू भएको अभियानमा गैँडाकोट, नवलपुर स्थायीबासी हाल अष्ट्रेलिया निवासी नवराज भट्टराईले ५ हजार रुपैयाँ र दीपेन्द्र यादवले जन्मदिनको अवसरमा ५ हजार रुपैयाँ सहयोग गर्नु भएको छ ।

हेटौँडा ९ निवासी व्यसायी नरेन्द्र भण्डारीले ५ हजार रुपैयाँ, हेटौँडा ४ निवासी स्वास्थ्यकर्मी निर्मला भ्लोनबाट ३ हजार रुपैयाँ प्राप्त भएको छ भने हेटौँडा १ का रामकुमार बर्तौलाले १५ हजार आर्थिक सहयोग प्रदान गर्नु भएको छ ।

भाद्र ३१ गते हेटौँडा ५ निवासी रजनी पौडेलले छोरा रिदम घिमिरेको जन्म दिनको अवसरमा ३ हजार रुपैयाँ, मातृभूमि साहित्य समाजका महासचिव हेटौँडा ४ का हेमन्त ढुङ्गेलले छोरी सँस्कृति ढुङ्गेलको शुभ जन्मदिनको अवसरमा २ हजार ५ सय, साइराम राकोसका व्यवस्थापक हेटौँडा ५ का राजकुमार तिमल्सिनाले ५ हजार रुपैयाँ उपलब्ध गराउनु भएको छ ।

यस्तै आश्विन १ गते नेपाल सरकारका अधिकृत ठाकुरराम भण्डारीले आफ्नी छोरी सर्जु भण्डारीको उज्ज्वल साहित्यिक जीवनको कामनामा ५ हजार ५५ रुपैयाँ, बालजागृति सेकेण्डरी इङ्लिस बोर्डिङ स्कुलका प्रिन्सिपल विनोद सुवेदीले १० हजार रुपैयाँ सहयोग गर्नुभएको छ भने हेटौँडा निवासी शिवहरि प्याकुरेलले २१ हजार रुपैयाँ सहयोग गर्नुभएको छ ।

काठमाण्डौं निवासी मुक्तक मञ्च काठमाण्डौंका अध्यक्ष तथा मुक्तककार राजेन्द्र घिमिरेले साहित्यिक उन्नयनका लागि ५ हजार रूपैयाँ सहयोग गर्नु भएको छ भने कृष्ण पौडेलबाट ३ हजार रुपैयाँ र हेटौँडा १३ पदमपोखरी निवासी शिक्षक केशव न्यौपानेले आफ्नो श्रीमती रमा न्यौपानेको जन्मदिनमा ५ हजार रूपैयाँ सहयोग गर्नुभएको छ ।

अन्य सहयोगी दाताहरूमा केशव सञ्जेलले २ हजार, नारायण बर्तौलाले ३ हजार र जनप्रिय माध्यमिक विद्यालयका प्रधानाध्यापक भुपेन्द्र चौलागाईँले ५ हजार ५ सय ५५ रूपैयाँ आर्थिक सहयोग गर्नुभएको छ भने साहित्यकार झम्क तिमल्सिनाले ७ हजार ५ सय सहयोग गर्नु भएको छ ।

यस्तै आश्विन २ गते आधुनिक राष्ट्रिय माविका शिक्षक कृष्णगोपाल श्रेष्ठको जन्मदिनकोअवसरमा ५ हजार, काठमाण्डौं निवासी साहित्य सर्जक, समालोचक महेश पौड्यालले ५ हजार, साहित्य सङ्गमको पूर्व उपाध्यक्ष ईन्द्रजीत शर्माले १० हजार, धरान निवासी कवि चन्द्र गुरूङले ५ हजार आर्थिक सहयोग गर्नु भएको छ ।

अध्यक्ष डीबी बर्तौलाले सङ्कलित रकमलाई अक्षयकोषमा जम्मा गराई सोबाट प्राप्त व्याजमार्फत् संस्थाको साहित्य सन्ध्या, पुस्तक विमर्श, रचना वाचन जस्ता नियमित गर्ने कार्यक्रम तथा आन्तरिक खर्च व्यवस्थापनमा सघाउ पुग्ने र यसबाट साहित्यिक उन्नयनमा सहयोग पुग्ने बताउनुभयो ।

केही सर्जक तथा साहित्यसेवीले आफ्नो नाम उल्लेख नगर्नेगरी सहयोग गर्नु भएको छ । संस्थाले आफ्नो बार्षिक स्मारिकामा सो बारे उल्लेख गर्ने र हाल सर्जकले नै सञ्जालमा उल्लेख नगर्नु भनेकाले नगरिएको अध्यक्षले जानकारी दिनु भएको छ ।

सहयोगीहरूले आफूलाई ईच्छा लागेको रकम कृषि विकास बैङ्क हेटौँडामा रहेको साहित्य सङ्गमको ०५-०८५-००२७३७९३-०१-१ र महालक्ष्मी विकास बैङ्क हेटौँडाको ०५९००१००३२७६३००००००८ खाताहरूमा सहयोग रकम जम्मा गर्न सकिने कोषाध्यक्ष मेनु तिमल्सिनाले बताउनुभयो ।

सङ्गमको मासिक सन्ध्या, विमर्श, एकल तथा संयुक्त विशेष कार्यक्रमहरू, खानेपानी, बिजुली, सरसफाइलगायतका नियमित खर्च व्यवस्थापनका लागि अक्षयकोषमा रकम जम्मा गरी सोबाट प्राप्त व्याज रकमले व्यवस्थापनमा सहज हुने तथा स्थापित पूरानो संस्था भएकोले नवपुस्ताहरूकेन्द्रित गतिविधि सञ्चालनमा समेत सघाउ पुग्ने उपाध्यक्ष सानु खनालले बताउनुभयो । उहाँले सहयोगी दाताहरूसँग निरन्तर सम्पर्कमा रही आर्थिक स्रोत जुटाउने कार्यमा संस्थाका अध्यक्षको सक्रियता निकै रहेको र धेरैको सहयोग मिलिरहेकोले यो अभियानले सार्थकता प्राप्त गर्ने जानकारी दिनुभयो । साथै उहाँले कोषको व्याजबाट कार्यक्रम चलाउन सके संस्थाले लिएका लक्ष्य तथा उद्देश्य पूरा हुने र हरेक कार्यक्रममा सहयोगी दाताहरू खोज्दै हिँड्नुपर्ने अवस्थाको अन्त्य हुने हुँदा साहित्यलाई माया गर्ने सबैबाट सहयोगको अपिल गर्नु भएको छ ।

हालसम्म २६ जनामध्ये धेरैले आर्थिक सहयोग जम्मा गराएका र बाँकी सबैले दशैंअघि जम्मा गर्ने वाचा गरिसकेका हामीलाई जानकारी प्राप्त भएको छ ।

यस साहित्यिक उन्नयनको अभियानमा फित्कौली डटकम पनि हातेमालो गर्न तयार छ । साहित्य सङ्गमको यो अभियान सफल बनोस्, हार्दिक शुभकामना ।

०००
– हेटौडाबाट संप्रस पौडेल