नेपाली हास्यव्यङ्ग्य अनलाइन पत्रिका

अर्काको पसिना पिएर कसरी हो प्यास मेटाउने

अर्काकै भरमा हिँडेर कसरी गन्तव्य भेटाउने

पाकेका फल छिन्नु पर्छ कसरी भन्ने कला सिक्नु छ

बेला मौसम चिन्नु पर्छ कसरी भन्ने कला सिक्नु छ ||१||

के बोले जनता जुरुक्क सजिलै उठ्छन् कहाँ जान्दछु

के बोले दगुरेर ट्वाक्क शिरमै कुट्छन् कहाँ जान्दछु

तात्तातो शिरबाट रक्त चुहुने पार्ने कला सिक्नु छ

आफूमात्र बची सबै समरमा मार्ने कला सिक्नु छ ||२||

आफ्नालागि लडून् मरून् बरु सबै बन्ने म हो टाउके

आफ्नै होस् बल बुद्धि शत्रु नरहोस् बन्ने म नै माउते

हात्तीका शिरमाथि आसन हुने मात्रै कला सिक्नु छ

बाँकीमा अनि दैत्य शासन हुने मात्रै कला सिक्नु छ ||३||

ढुङ्गाका युगमा थिए ऋषिहरू ढुङ्गा पुजेरै गए

आफ्नो ज्ञान तमाम सर्वहितमा अर्पे र नाङ्गै भए

ऐलेको युगमा ममात्र कसरी बढ्ने कला सिक्नु छ

तुक्काका भरमा विकास चुचुरा चढ्ने कला सिक्नु छ ||४||

सत्तामाथि पुगेर घातक हुँदै टेक्ने कला सिक्नु छ

भत्तामाथि रमेर नाटक खुदै देख्ने कला सिक्नु छ

दोषारोपणका नयाँ र सजिला खेती गरी देशमा

हत्या गर्न तयार भै मुलुक यो बेच्ने कला सिक्नु छ ||५||

इङ्ल्याण्ड