नेपाली हास्यव्यङ्ग्य अनलाइन पत्रिका

हास्यव्यङ्ग्य शिल्पी विष्णु प्रभातको जन्म वि.सं. २००९ साल बैशाख १० गते माता मनकुमारी र पिता ऋषिराम अर्ज्यालका प्रथम पुत्रका रूपमा पाल्पाको मदन पोखरा- १ मा भएको हो । साहित्य क्षेत्रमा विष्णु प्रभातका नामले प्रख्यात भए पनि उहाँको खास नाम विष्णुप्रसाद अर्ज्याल हो । बाल्यकालदेखि नै केही रचनात्मक कार्य गर्न मन पराउने प्रभातले एम.ए. (नेपाली २०५२) बी.एड. अध्यय गर्नु भएकाे छ । भैरव अर्यालमा केन्द्रित विद्यावारिधिकाे शोध भने अधुरै रहेकाे छ । प्रभातको साहित्य लेखन वि.सं. २०२९ सालबाट शुरु भएको हो । उहाँको पहिलो प्रकाशित रचना (कविता विधाको) ‘म जगत हेर्दै थिएँ’ हो । यो कविता पाल्पाबाट प्रकाशित श्रीनगर पत्रिका (२०२९) मा छापिएको थियो । समालोचक, कवि, दार्शनिक, एवं हास्यव्यङ्ग्य निबन्धकार विष्णु प्रभातका हालसम्म झण्डै बाइसवटा कृतिहरू प्रकाशित छन् । ती मध्ये ‘खुर्सानी पुराण’(२०५१), ‘खुच्चिङ्’ (२०५३), ‘खुलदुली’ (२०५६), ‘खुलैखुला कुरा’ (२०५७), ‘खुराक’ (२०६०), ‘खुसखुस कम्पनी’ (२०६०) हास्यव्यङ्ग्य कृतिहरू हुन् ।