नेपाली हास्यव्यङ्ग्य अनलाइन पत्रिका

वालिङ, स्याङ्जा २०८१ साउन २६। मातापिता प्रतिष्ठान वालिङ स्याङ्जाले जेष्ठ नागरिकहरुलाई सम्मान गरेको छ ।

वालिङ नगरपालिकासँगको सहकार्यमा प्रतिष्ठानले वालिङ नगरपालिकाका ८४ वर्ष माथिका जेष्ठ नागरिकहरुलाई शनिबार वालिङको पतञ्जलि योगपीठको सभाहलमा एक कार्यक्रममा बीच सम्मान गरेको हो ।

ज्येष्ठ नागरिक सम्मान, प्रतिष्ठानको प्रथम साधारण सभा तथा विशेष प्रवचन कार्यक्रममा नगरपालिकाका १४ वटै वडाका ८४ वर्ष माथिका प्रतिनिधिमूलक रुपमा एक एक जनालाई सम्मान गरिएको थियो । सम्मानित हुनेहरूमा क्रमश: रुपकुमारी काफ्ले, लालबहादुर थापा, मतीलाल खनाल, होमबहादुर भाट क्षेत्री, सावित्री तिवारी, बखतबहादुर गुरुङ, चन्द्रकला सुवेदी, ज्योतिलाल पराजुली छविलाल थापा मगर, लालचन गैह्रे, चन्द्रबहादुर नगरकोटी, शशिघर घर्ती र युवराज डुम्रे हुनुहुन्छ ।

कार्यक्रममा गण्डकी प्रदेश सभा सांसद एवं अर्थ तथा विकास समितिका सभापति भोजराज अर्यालले पछिल्लो समयमा मानवमा नैतिकता कम हुँदै गएकोमा चिन्ता व्यक्त गर्नुभयो । मानव जीवनमा सेवा र आत्मीय भाव भएन भने समाजमा विकृति र विसङ्गतिको विकास हुने बताउनुभयो ।

प्रतिष्ठानको उद्देश्य उद्देश्य पूरा गर्नका लागि सबैले हातेमोलो गर्नुपर्ने भन्दै घरमा मातापिता तथा जेष्ठ अभिभावकहरुको सेवा गरिएन भने मन्दिरमा देउता पुज्नुको कुनै औचित्य नहुँने सभापति अर्यालले बताउनुभयो ।

कार्यक्रममा कालीगण्डकी ज्ञानविज्ञान प्रतिष्ठानका अध्यक्ष चैतन्यकृष्ण महाराजजीले बाल संस्कार, मातापिताप्रतिको कर्तव्यलगायतका विषयमा प्रवचन दिँदै बालसंस्कार सिकाईएन भने धेरै सुधारगृहहरु खोल्नुपर्ने बाध्यता हुने बताउनुभयो । संस्कार र आध्यात्म चिन्तनको अभावले समाजमा विकृति देखा परेको भन्दै यसको जटिलताका विषयमा बेलैमा सचेत हुनुपर्नेमा उहाँको जोड छ ।

कार्यक्रममा वडा अध्यक्षहरु वडा नं. ८ का अध्यक्ष दामोदर तिवारी, ७ का अध्यक्ष पाण्डुकुमार थापा, ५ का अध्यक्ष छवि आले, ११ का अध्यक्ष डण्डपानी पंगेनी, सम्मानित जेष्ठ व्यक्तिहरुकोे तर्फबाट पूर्व मेयर लालचन्द गैह्रे, बयोवृद्ध तुलसीराम पंगेनी, गायक बुद्धिसागर बस्याललगायतले प्रतिष्ठानको कार्यप्रति प्रशंसा व्यक्त गरेका थिए ।

सम्मानित ज्येष्ठ नागरिकहरुलाई नगद रु ११०० सहित सम्मानपत्र प्रदान गरिएको हो । क्रर्यक्रममा प्रतिष्ठानका अध्यक्ष श्यामप्रसाद ढुङ्गानाको अध्यक्षता, सचिव भरत बगालेको सञ्चालन, वरिष्ठ उपाध्यक्ष प्रदीप रेग्मी बगालेको स्वागत मन्तन्य र उपाध्यक्ष शंकर सुवेदी धन्यवाद ज्ञापन गर्नु भएको थियो ।

कार्यक्रममा यमकान्त खनाल, पदम पाण्डे र विष्णु सुवेदी गैह्रे अध्यक्ष मण्डल रहको बन्त्र सत्रले श्यामप्रसाद ढुङ्गानाको अध्यक्ष रहेको २० सदस्यीय समिति निर्विरोध चयन गरेको छ ।

०००
– श्याम ढुङ्गानाद्वारा संप्रेषित