नेपाली हास्यव्यङ्ग्य अनलाइन पत्रिका

डा. लोकेन्द्रप्रसाद पौड्याल :

यता फर्क्याे उता फर्क्याे गल्दो उमेर जात्रा
नबुझ्नेलाई झर्को लाग्ने जीवनको यात्रा

यौटा कुना बुढी “ऐया” छाम्ने आफ्नो घुँडो
अर्कोतर्फ अलग “ऐया” ओछ्यान पर्‍या बुढो

उमेरमा फुर्ति लाउने तिनै बुढाबुढी
आजकल त पीडा पोख्छन् व्यथा बाँडिचुँडी

घरभित्रको बोलि प्रायः “ऐया-ऐया” मात्र
घडी हेर्दै दिन काट्ने बृद्ध उमेर पात्र

पहिले त अरु आउँथे मद्दत गर्न भनि
अहिले त कोहि आउन्नन् चिनजानका पनि

नातागोता साथीभाइ सवैजसो पर
बुढ्यौलीको वाद्य जीवन अति कष्टकर

बुझ्नेले त सहि देलान् गल्दो ज्यानको पारा
नबुझ्नेले हल्का ठान्छन् “ऐया-ऐया” सारा

कसैले त भन्न भ्याउँछन “बुढ्यौली रवैया”
बृद्ध उमेर जीर्ण शरीर वाद्य “ऐया-ऐया ?” ॥

०००
काठमाडौं