नेपाली हास्यव्यङ्ग्य अनलाइन पत्रिका

डा. बमबहादुर जिताली :

आमाको धर्म गुनिलो
बुवाको कर्म नुनिलो-
धर्म र कर्म मिलेर
जीवन बन्यो सुनौलो ।

झरेर दाँत थोते भो
बोलेको पनि तोते भो ।
ठान्दैन युवा प्रखर
आखिर बुवा शिखर ।

पुरानो नयाँ सुन हो
नयाँले देख्ने गुन हो ॥
चिनेमा हीरामोती हो
आँखाको नानी ज्योति हो ।

नानीको ज्योति उचाल्ने
भोलिको बानी बसाल्ने-
माता र पिता द्यौता हुन्
सयमा खाँटी नेता हुन् ।

बुढ्यौली जून डाँडाको
पहेंलो घाम टाढाको ।
देखिन्छ कति सुन्दर
किन्नरी हुन् कि किन्नर ॥

०००

नागार्जुन न.पा.-१, रानीवन, काठमाडौँ
९८४१४९१०८१