नेपाली हास्यव्यङ्ग्य अनलाइन पत्रिका

लक्ष्मीप्रसाद फुयाल :

१.
गरिबका झुपडीमा मात्रै दुई मुठ्ठी जाडो हुन्छ
बिहान बेलुका हातमुख जोड्नै पसारो हुन्छ
जाडो पनि हैँसियत हेरेर आइदेन ऐ प्रकृति !
धनीलाई वस्त्र छ गरिबलाई श्रम नै आगो हुन्छ ॥

२.
न वर्ग न वणर् सामाजिक हितमा सवै जुट्नुपर्छ
सद्भावको हात बढाउँदै राष्ट्रगितमा सबै जुट्नुपर्छ
आऊ हातेमालो गर्दै एउटा प्रेमको बिरुवा रोपौँ
व्यक्ति भन्दा समाजको जितमा सबै जुट्नुपर्छ ॥

३.
तलाउमा कमलसँगै पहरामा सुनाखरी फुल्न सकोस्
भोक, शोक, तृष्णा, तृप्ती सबैका घरमा डुल्न सकोस्
मधेशमा शितलहरको कहर, भोक अत्याउछ झुपडीमा
धनी गरिब सबैका झुपडीमा प्रेमिल शरद घुल्न सकोस् ॥

४.
पर्ख साथी ! अँधेरीरात ढलेपछि उज्यालो दिन उदाउँछ
उल्लुको उलुलु उलुलु मात्र होइन कोइलीले पनि गाउँछ
कलमले चेतना पोख्नुपर्छ विवेक ओछ्यावोस् आँखाले
हर नेपालीका रगतमा देशप्रेम भरे पक्कै खुशी आउँछ ॥

०००
पथरी शनिश्चरे, मोरङ