लक्ष्मीप्रसाद फुयालनलेखिएको कविता
जुन कविताले गाउँ समाज र देश बदलियोस् रत्नाकर वाल्मीकि बनोस् हिटलर बुद्ध बनोस् कविताको यश कृति पनि तिनै लोकमा फैलियोस् हो यस्तै एक कविता अझै लेख्न बाँकी छ मैले ।
लक्ष्मीप्रसाद फुयाल :
लेख्न बाँकी नै छ
एउटा यस्तो कविता
जुन कविता सुनेर
आकाशमा उड्दै गरेको बादल
ठप्प रोकियोस्
सुख्खा जमिनमा घनघोर बर्षिएर
जलमग्न हुन् खेत खलियान
वर्षौदेखि तिर्खाएका
तृप्त हुन् ती सारा पशुपंक्षी कीट पतङ्ग
खेतमा मुर्झाएका बाली
कविताका श्लोक सुनेर लहलह झुलुन्
ढकमक्क फुलुन बगैंचाका रङ्गिविरङ्गी फूलहरू
गोठमा बाँधेक गाईले प्रसस्त दुध दिउन्
बाख्राका पाठा कविता सुन्दासुन्दै हलक्क बढुन्।
अस्त्ररुपि कविताका विम्बका झंकारले
भ्रष्टाचार गर्दैगरेका हाकिमको हात कामोस्
अन्यायपूर्ण फैसला गर्ने
न्यायमूर्तिकाे तराजु बेस्सरी हल्लियोस्
कुख्यात डाकुमा कविता सुनेर वैराग जागोस्
दुराचारी अत्याचारीका रोम रोम र्थररर कामुन्।
विदेशिदै गरेका युवा युवती
कविताले देशप्रेमको भाव जागेर
आधाबाटो बाटै झोला फ्याँकेर फन्नक फर्किउन्
हात हातमा औजार बोकेर लम्कदै
देश विकासमा कम्मर कसेर लागुन्।
तोते बोल्दै गरेको नानीले पनि
कविताका श्लोक पढ्दापढ्दै स्पस्ट बोलोस्
ऋचाका मन्त्र झैं कविताको मृदुल भाव
कानमा गुञ्जायमान हुँदा
अस्पतालमा छट्पटाएका बिरामी
जर्याक जुरुक्क उठेर बाटो लागोस्
मृत्युुशैयामा पीडाले छट्पटाउदै गरेका
असक्त रोगी वृद्धवृद्धाहरू
हाँसीहाँसी प्राणमुक्त भएर गोलोक प्राप्त गरुन्।।
जुन कविताले गाउँ समाज र देश बदलियोस्
रत्नाकर वाल्मीकि बनोस्
हिटलर बुद्ध बनोस्
कविताको यश कृति पनि तिनै लोकमा फैलियोस्
हो यस्तै एक कविता अझै लेख्न बाँकी छ मैले ।।
०००
२०८० -८-२४
पथरी शनिश्चरे, मोरङ
Subscribe
Login
0 Comments
Oldest
