नेपाली हास्यव्यङ्ग्य अनलाइन पत्रिका

नन्दलाल आचार्य :

उमेर ढल्केको देखौला
तर म ढल्केको छैन
पाकेर फ्यात केस
र, अनुहारमा सयपत्र मुजा होलान्
तर म अनुभवले खारिएको छु
मुजा मेरो त्यही प्रमाणपत्र हो,
तसर्थ म बूढो हैन,
मैले रोगको घर बनाएको छैन,
म अज्ञानको शत्रु हुँ
आलस्य मलाई सह्य छैन
अकर्मण्यता मेरो हुँदै हैन
मलाई अभाव केहीको छँदै छैन ।

म साथी हुँ,
आउँदो जूनको
उदाउँदो घामको
म परम शत्रु हुँ,
कालो रातको, अनिकाले साथको
नभएर ढल्कने अनिकाले ढिकीको ।

त्यसैले त,
श्रीमती मेरी श्रीमतीजस्ती छैन बुहारी
मेरी बुहारी हुँदै होइन
छोरा र नाति अनि छोरी र नातिनीहरू
नाताको स्यानो कोठामा खुम्चिन मान्दै मान्दैनन्
मलाई बूढो बा भनी गन्दै गन्दैनन् उनीहरू त मलाई
अनुभवको सम्राट भन्छन्
नातामा अभिन्न मित्र ठान्छन्
प्रेरणाको अपूर्व पुञ्ज मान्छन् ।

०००
२०८०-११-२६
(मधेश प्रदेशस्तरीय बुढ्यौली साहित्य समाजको चन्द्रनिगाहपुरको कार्यक्रममा प्रस्तुत)