नेपाली हास्यव्यङ्ग्य अनलाइन पत्रिका

हेम अधिकारी :

चौतारो छ पुरानु दर्शक बनी बुन्दै छ आफ्नो कथा
पैलेदेखि सनातनी र जति छन् चल्दै रहेका व्यथा
लाखौँ कष्ट सही निरन्तर रही रुङ्दैछ भञ्ज्याङमा
मेटे मानिसले थकाइ त्यसमा यात्रा र सञ्जालमा ।

जोडी वृक्ष सधैँ सधैँ बरसँगै अश्वत्थ जागा बसी
गर्छन् ध्यान पवित्र पार्न सबमा आशाभरोसा बनी
चौतारी कसले रच्यो गुण भयो रोपी बरै पिप्पल
बस्तैछन् युगसाक्ष्य सत्व गुणका बाँडी सधैँ शीतल ।

वृद्धावृक्ष रुँगेर गाउँ घरका प्राचीनका वैभव
हुन्छन् शीतल ताप्न ती पथिकका आशाभरोसा सब
सारा वर्षबिते बिते दिन यहीँ थोत्रो भरोसा घर
चौतारी तिनको छ साथ दिलको विश्वासको सुन्दर ।

हामीझैँ बिचरा रुँगी दिनदिनै आँधीहुरी वादल
वर्षा शीत र घामको चहकिलो तातो सबै सामल
जम्मै कष्ट सहेर सादर सधैँ चोखोनितो पातका
श्रद्धासाथ दिने पवित्र पतका छाया सधैँ साथका ।

कोही छैन सहाय हाय ! तिनको लिन्छन् अरूले सधैँ
जो हुन्थ्यो पहिले घट्यो भिड सबै बस्ने र हिड्ने यसै
को बुझ्ला तिनको पिडा कति अझै काट्छन् सहाराबिना
चौतारी चकमन्न शान्त सरसी बस्तैन कोही यहाँ ।

०००
झापा, हाल क्यानडा