नेपाली हास्यव्यङ्ग्य अनलाइन पत्रिका

भावना न्याैपाने :

जब म बुढो हुनेछु मेरो शरीर जीर्ण हुनेछ
मलाई तिमीहरूको साथ चाहिन्छ
त्यतिबेला के तिमीहरूले मलाई साथ दिनेछौ ?

जब म बुढो हुनेछु कान सुन्न र कुरा बुझ्न नसकुँला
के तिमीहरूले एउटै कुरा
दोहोराएर सुनाउन बुझाउन सक्नेछौ ?

जब म बुढो हुनेछु दाँत नहुन सक्छ
खाँदा गला लाग्न सक्छ
के तिमीहरूले सधैं गिलो खाना बनाएर
खुवाउन सक्नेछौ ?

जब म बुढो हुनेछु तागत पनि कमजोर हुनेछ
अचानक मेरो
हातबाट तिमीहरुले किनेका
महँगो शिसाको गिलास फुट्न सक्छ
के तिमीहरूले गाली नगरी माफ गर्न सक्नेछौ ?

जब म बुढो हुनेछु आँखा देख्न नसकुँला,
हात गोडा चल्न नसक्ला
के तिमीहरूको हातले खुवाएर
मेरो भोक प्यास मेटाउनेछौ ?

जब म बुढो हुनेछु हाडजोर्नी दुखेर पीडा सहन नसकी
रन्थनिदै कराउनेछु, रुनेछु
के तिमीहरुले त्यतिबेला मेरो पीडा कम गर्न
हात गोडामा मालिस लगाउनेछौ ?

जब म बुढो हुनेछु, रोगी हुनेछु
र असक्त भई बिछौनामै रहनेछु
के तिमीहरूले मलाई घिन नमानिकन
स्याहारसुसार गर्न सक्नेछौ ?

जब म बुढो हुनेछु मेरो अन्तिम समय आउनेछ
मेरो स्वास जान गाह्राे हुनेछ
के त्यतिबेला तिमीहरूले मलाई रामको नाम
सुनाएर पार लगाउन सक्नेछौ ?

जब म बुढो हुनेछु अन्तिम स्वास लिई
यस धर्तीबाट बिलिन भई
आकाशबाट सधै नियालिरहनेछु
के तिमीहरूले पनि
मलाई सधै सम्झनामा राख्नेछौ ?
के तिमीहरूले पनि मलाई
सधै सम्झनामा राख्नेछौ ?

०००
भक्तपुर