नेपाली हास्यव्यङ्ग्य अनलाइन पत्रिका

भावना न्याैपाने :

जब म बूढो हुनेछु मेरो शरीर जीर्ण हुनेछ
मलाई तिमीहरूको साथ चाहिन्छ
त्यतिबेला के तिमीहरूले मलाई साथ दिनेछौ ?
जब म बूढो हुनेछु कान सुन्न र कुरा बुझ्न नसकुँला
के तिमीहरुले एउटै कुरा दोहोराएर सुनाउन बुझाउन सक्नेछौ ?

जब म बूढो हुनेछु दाँत नहुन सक्छ खाँदा गला लाग्न सक्छ
के तिमीहरुले सधैं गिलो खाना बनाएर खुवाउन सक्नेछौ ?
जब म बूढो हुनेछु तागत पनि कमजोर हुनेछ
अचानक मेरो हातबाट तिमीहरुले किनेका
महँगो सिसाको गिलास फुट्न सक्छ
के तिमीहरुले गाली नगरी माफ गर्न सक्नेछौ ?

जब म बूढो हुनेछु आँखा देख्न नसकुँला
के तिमीहरूको हातले खुवाएर मेरो भोक प्यास मेटाउनेछौ ?
जब बूढो हुनेछु हाडजोर्नी दुखेर पीडा सहन नसकी
रन्थनिदै कराउनेछु रुनेछु
के तिमीहरुले त्यतिबेला मेरो पीडा कम गर्न
हात गोडामा मालिस लगाउनेछौ ?

जब म बूढो हुनेछु, रोगी हुनेछु र अशक्त भई बिछ्यौनामै रहनेछु
के तिमीहरूले मलाई घिन नमानिकन
स्याहारसुसार गर्न सक्नेछौ ?

जब म बूढो हुनेछु मेरो अन्तिम समय आउनेछ
मेरो श्वास जान गाह्राे हुनेछ
के त्यतिबेला तिमीहरूले मलाई
रामको नाम सुनाएर पार लगाउन सक्नेछौ ?

जब म बूढो हुनेछु अन्तिम श्वास लिई
यस धर्तीबाट बिलिन भई आकाशबाट सधैं नियालिरहनेछु
के तिमीहरूले पनि मलाई सधैं
सम्झनामा राख्नेछौ ?

०००
भक्तपुर