कृष्णदेव रिमालसञ्जाल एकता – जिन्दावाद !!!
उनकै हक हीत रक्षार्थ नाराहरू तय गर्दछु अविरल सञ्जाल - प्रवाह गर !! आँखा दुख्यो - आँखा भत्ता दे !! लाइभ बस्दा - किचकिच हैन !! किताब पढ्ने - फुर्सद छैन !! किताब छाप्न - बन्द गर !! सञ्जाल एकता - जिन्दावाद !!
कृष्णदेव रिमाल :
औंला दुखाइदुखाई आँखा सुकाइसुकाई
उल्टो आफैले पैसा तिरितिरी
महान समयको सदुपयोग गरिगरी
एकोहोरो सामाजिक सञ्जाल चलाइरहेका
विश्वका सारा यी तल्लीन मजदुरहरूलाई
मइ दिवसको हार्दिक शुभकामना ।
कारखाना मजदुरलाई शुभकामना भन्नै परेन
सारा कलकारखाना पहिल्यै बेचियो,
पछि कलकारखाना खुलेकै छैनन्।
खेती मजदुरलाई शुभकामना भनौं भने
हिमालदेखि तराइसम्म खेतबारी बाँझै छन्
उपत्यकाको उर्वर जमिनमा घर बनिसके।
स्वदेशी मजदुरलाई शुभकामना भनौं भने
कोहि रेमिटेन्स लिन खाडीमा गएका छन्,
कोहि रेमिटेन्स पुर्याउन अष्ट्रेलिया गएका छन् ।
बचेखुचेका प्रतिष्ठानका मजदुरलाई
मे डे को शुभकामना भनौं भने पनि
सेवा करारको नाममा पसिना निचोर्न जाने
बिचौलिया दलाल पुँजिपतिहरू
मजदुरको भेषमा झण्डामुनि छन् ।
त्यसैले यो महान दिनमा तिनै इमान्दार
सञ्जाल मजदुरहरूलाई शुभकामना अर्पन्छु
उनकै हक हीत रक्षार्थ नाराहरू तय गर्दछु
अविरल सञ्जाल – प्रवाह गर !!
आँखा दुख्यो – आँखा भत्ता दे !!
लाइभ बस्दा – किचकिच हैन !!
किताब पढ्ने – फुर्सद छैन !!
किताब छाप्न – बन्द गर !!
सञ्जाल एकता – जिन्दावाद !!
०००
काठमाडाैं
Subscribe
Login
0 Comments
Oldest
