नेपाली हास्यव्यङ्ग्य अनलाइन पत्रिका

हेम अधिकारी :

छोरी/चेली बिनाको तीज वर्षा सानु बिदा भई अब हिलो
धोई पखाली गरी आई शान्त, सफा, सुरम्य, सरसी यो
सारदी सुन्दरी हाम्रा पर्व अदम्य हर्ष सपना निम्ता यसैले गरी
आयो तीज लिएर आज सबका छोरी र चेली भरी ॥२५

आयो तीज गयो हिलो शरदको शोभा सबै झल्किए
सारीले हरियी ,लपक्क धरती ,आभा खुले टल्किए
हाम्रा पर्वतराज दिव्य सुनका,चाँदी,हिराका घर
चेलीले भरिपूणर् गाउँ घरका बाटा सफा सुन्दर ॥२६

आए गाउँभरी रमेर तनया हाँसे हँसाए घर
चम्काए सब गाउँनै झिलिमिली भो तीजको हर्हर !
गाई सुन्दर भावका सरसिला राम्रा मिठा गीतले
टाडाका बहिनी दिदी मिलनमा हाँसीखुशी प्रीतले ॥२७

पैसाले धनले बरालिन गए बाँच्तैन है संस्कृति
झल्काई गहना छ होड कतिमा बड्दोछ अस्वीकृति
ऐले तीज कसो कसो हुनगयो भाँडिन्छ भाँडिन्छ कि
हाम्रो हार्दिकता दिदी र बहिनी मासिन्छ मासिन्छ कि !२८

छोरी छन् जसका, सजाइ घरमा आई सबै चम्किने
बाआमा दिलका पियार मनका आशा सहारा हुने
क्या हाँसो ! घरमा लिएर ,सबका चेली हुने हाजिर
फिक्का यो कति हुन्छ! तीज, नहुँदा छोरी, नियास्रो घर ॥२९

०००
दमक, झापा