नेपाली हास्यव्यङ्ग्य अनलाइन पत्रिका

रामशरण न्यौपाने :

गरी खेतीपाती सहजसितले पेट नभरी
बुहारी भित्र्याई सुख सयलको चैन नगरी
तुवाँलो छाएको बहुत धमिलो यो प्रहरमा
न जा भन्दा छोरो लुरुलुरु गयो त्यो सहरमा॥१

गरी खेतीपाती पनि फसल त्यो हुन्न गतिलो
कुलो भत्केकोले वरिपरि जगा छैन रसिलो
बुढी आमा भन्छिन् जिउनु कसरी हा कहरमा
न जा भन्दा छोरो लुरुलुरु गयो त्यो सहरमा॥२

गरूँ खेती आफू हरबखत नै लाग्दछ ढिलो
लिऊँ सेवा भन्दा पनि श्रमिकको छैन सजिलो
म एक्ली आमाले घरजम गरूँ के कहरमा?
न जा भन्दा छोरो लुरुलुरु गयो त्यो सहरमा॥३

सिमाना चोर्नेले पनि बहुत नै गर्छ फजिती
गरी घम्साघम्सी बल प्रबलले हुन्न नजिती
अरूको हल्लामा धन र सुखको त्यो रहरमा
न जा भन्दा छोरो लुरुलुरु गयो त्यो सहरमा॥४

बलात्कारी घुम्छन् कुनियत लिएरै चिलसरि
अँध्यारो कोठामा यस मुलुकको कानुन परी
सयौँ केटा केटी प्रति दिन फसे हो जहरमा
न जा भन्दा छोरो लुरुलुरु गयो त्यो सहरमा॥५

छ आयस्ताभन्दा पनि बहुत झन् खर्च घरमा
बढेको रोजै झन् बहुत महँगी देख्दछु यहाँ
बुढीआमा भन्छिन् अब त डुबियो लौ नहरमा
न जा भन्दा छोरो लुरुलुरु गयो त्यो सहरमा॥६

०००
भक्तपुर