नेपाली हास्यव्यङ्ग्य अनलाइन पत्रिका

दीनानाथ पोख्रेल :

छक्कापञ्जा खुसीका अभयसित डुलून् चेत दृष्टि फिँजारून् ।
आफ्नै आर्जेर सङ्ला सुखसयल टिपूँ रोग टन्टा लघारून् ।
मान्छे आफू बनेमा सब भव सुखको खोज्छ बाटो सकारी ।
बाबाआमा रमाऊन् हरदिन घरमा मिल्छ उल्लास भारी ।‌।११।।

खोला मेरा सुसाई रनवन सुखका बज्दछन् दिव्य गाना ।
खोजूँ आफ्ना कालाले अतिशय रसिलो गर्विलो दिव्य पाना ।।
बढ्नेछन् सौख्य सङ्ला सकल मनुजका भावभङ्गी उघारी ।
बाबाआमा रमाऊन् हरदिन घरमा मिल्छ उल्लास भारी ।‌।१२।।

आत्मा तान्ने गुफा छन् परपर म छरूँ पाहुना डुल्न आऊन् ।
देखाई हेर्न लाने जनमन सुखले बाँच्न पैसा कमाऊन् ।।
खोजूँ राम्रा कलाले जनमन बहका पूर्ण भारी निथारी ।
बाबाआमा रमाऊन् हरदिन घरमा मिल्छ उल्लास भारी ।‌।१३।।

अग्ला डाँडा सुनौला मनुजमन छुने दृश्य खुल्छन् हजार ।
डाँडाकाँडा खुलेका अति शुभलय छन् शान्ति शोभा बजार ।।
आऊन् नौला घुमन्ते हृदय सुख टिपी बन्छ आफू पुजारी।
बाबाआमा रमाऊन् हरदिन घरमा मिल्छ उल्लास भारी ।‌।१४।।

कर्मी भाका उचालूँ गिरिशिर म चढूँ पूर्ण संसार देखूँ ।
नौलो बाटो उज्यालो भवभर युगको मागको चित्र लेखूँ।।
खुल्नेछन् मान्यताका नवशिखर बनी घुम्छ आफैँ विचारी।
बाबाआमा रमाऊन् हरदिन घरमा मिल्छ उल्लास भारी ।‌।१५।।

०००
इलाम नगरपालिका वडा नं ०२, इलाम