नेपाली हास्यव्यङ्ग्य अनलाइन पत्रिका

दीनानाथ पोख्रेल :

त्यागूँ उद्दण्ड चाला रसमय पथले बाँड्छ आशा सदैव ।
छन् आकाङ्क्षा अनेकौँ श्रमपथ म हिँडूँ दाहिने बन्छ दैव।।
दुर्छे घुर्की पछारूँ असल कृत चुनूँ भोकचिन्ता लघारी ।
बाबाआमा रमाऊन् हरदिन घरमा मिल्छ उल्लास भारी।।२१।।

गाऊँ सद्भावनाले कविकृत कविता कर्मका मार्ग खोजूँ ।
प्यारो सङ्घर्ष मान्दै मृदु फल बटुलूँ कर्मको मार्ग रोजूँ ।।
भागून् सङ्कीर्ण बानी रसमय दिल होस् दिव्य ऊर्जा उमारी ।
बाबाआमा रमाऊन् हरदिन घरमा मिल्छ उल्लास भारी।।२२।।

पानी बग्दै छ हेरूँ पर जनहितमा गर्न जानूँ म सेवा।
सित्तैमा वायु पाएँ जल जमिन खुला व्योमको मिल्छ मेवा ।।
मान्छेझैँ कृत्य खोजूँ अवनितल खुलोस् कर्म पोखूँ विचारी ।
बाबाआमा रमाऊन् हरदिन घरमा मिल्छ उल्लास भारी ।।२३।।

डाँफे मायूर मैना प्रकृतिलयसँगै रम्दछन् हेर्न जानूँ ।
माघे जाडो तुषारो प्रकृतिनियम हुन् छल्न हालूँ म छानु ।।
धर्तीमा ग्रीष्म आओस् स्थल जलमय होस् ऐन हो यो विचारी ।
बाबाआमा रमाऊन् हरदिन घरमा मिल्छ उल्लास भारी ।।२४।।

फ्याँकूँ उद्भ्रान्ति टाढा घरघर जनका पूर्ण सद्भ्रान्ति छाओस् ।
बाँडोस् यो बाँसुरीले मनुज कृत कला चेत च्याप्पै समाओस्।।
भेटेँ सद्भ्रान्ति प्यारो मनन मन गरोस् दृष्टि शोभा फिँजारी ।
बाबाआमा रमाऊन् हरदिन घरमा मिल्छ उल्लास भारी ।।२५।।

०००
इलाम नगरपालिका वडा नं ०२, इलाम