नेपाली हास्यव्यङ्ग्य अनलाइन पत्रिका

शरण खत्री ‘मृदुल’ :

कस्तो अनौठो र उदेकलाग्दो पनि संसार हुन्छ
कोही मर्दा रोइदिन्छ कोही मर्दा बेखबर हुन्छ।

हिर्काइ पनि त बस्तुपिच्छे कहा एउटै हुन्छ
फूलले हान्दा स्पर्श हुन्छ पत्थरले प्रहार हुन्छ।

एकै पल्ट के हेरिन् उनले मन भुतुक्कै भयो
कसैको त कस्तो कस्तो पनि नजर हुन्छ।

भव्य महलमा पुर्याऔ बिरालोले मूसा देख्छ
हेराइ पनि त मान्छेको स्तर अनुसार हुन्छ।

हिजो त्यही अखवारले उसलाई चर्चित बनायो
आज उसैको खोइरो खन्ने त्यही अखवार हुन्छ।

उसले के बोल्यो र कसलाई दुखायो छोड्दिनुस्
बरू सोच्नुस् कहिलेकाहि मान्छेमा भूत सवार हुन्छ।

यौटा टुहुरोको बाल्यकाल जडाउरीमै बितिगयो
कस्ले देख्यो उसलाई नि नया लुगाको रहर हुन्छ।

०००
दाँवा, भाेजपुर