नेपाली हास्यव्यङ्ग्य अनलाइन पत्रिका

शरण खत्री ‘मृदुल’:

१.
स्वार्थ मिले दुई ध्रुव नि आपसमा जुट्दा रहेछन्
बाझे स्वार्थ एकै आँतका साथी पनि फुट्दा रहेछन्
शक्ति र सत्ता भन्नु अजीव चीज रहेछन्
जसको आडमा दोषी पनि धमाधम छुट्दा रहेछन् ।

२.
धमिराहरू कुदिरहेछन् मालिकको जयजयमा
विसङ्गति उर्लिरहेछ उन्मादिलो वयमा
यो प्रश्न कहिलेसम्म अनुत्तरित रहने होला
सम्झिँदा नि दिक्क लाग्छ क्रोध अग्नि बल्छ
देश कहिले हिड्ने होला सुशासनको लयमा ?

३.
काटेर आफ्नो भागको भात अनि तरकारी
वचत गरे जनताले आफ्नै ठानी सहकारी
तर कहाँ आफ्नो रहेछ आफूले ठानेजस्तो
यो त रहेछ ठूलाहरूको रकम झिक्ने भकारी।

०००
दाँवा, भाेजपुर