नेपाली हास्यव्यङ्ग्य अनलाइन पत्रिका

धनराज गिरी :

दुःख पाउनुथियो
सोचियो
किन यस्तो सोचियो ?
किन कि
जीवनमा आए केही उकासो र पिकासोहरू
हातमा
पवन ठुसक यन्त्र लिएर
मलाई बेलून बनाउन
भने
” हजुर जस्तो मान्छे! ”
“हजुर प्रतिभाशाली!”
उकासे
हो जस्तो लाग्यो
सोचियो
“म अब व्यक्ति होइन!”
व्यक्तित्व
खास व्यक्तित्व
गोवर्धन धान्न आएको
अर्को
गिरिधारी विशिष्ट !
अनि
समाइयो कलम
ठोकियो
ठोकियो
ठोकियो
अरे वा
मेरै यात्रा रोकियो
टक्क अडेर विचार गरियो
मलाई शहीद बनाएर
स्यालहरू सत्तामा
वाह
म कुमेधाश्री !
ज्या ज्या ज्या !
सन्तानलाई तनाव
घरमा अभाव
इतिहास हेरियो
व्यक्तित्व मानिएका
व्यक्तिहरूको
दोस्रो पुस्ता
सखाप
समाजसेवी त बने
नाम भयो
निस्तो नामले के हुन्छ?
छोराछोरीको बे हुन्छ ?
सोचियो
“म व्यक्तित्व होइन
म केही पनि होइन
अति उच्च महत्वाकांक्षा = खोक्रोपन”
अनि
निर्णय बदलियो
म व्यक्ति
म आम
काङ्ग्रेस न वाम
न भाम
अब आराम
ॐ शान्ति ॐ
ती
उकासो र पिकासोहरूले
त
मलाई
पहिले मतियार र पछि हतियार बनाएर
यूज एन्ड थ्रो गर्न खोजेका
पक्का
पूर्व व्यक्तित्वहरू
दुःखी आत्मा
म
प्रोफेसर जगमोहन आजाद
आम, आम, आम
एक कण
गङ्गु तेली
राजा भोज बन्नुछैन
म यस्तो
म उस्तो भन्नुछैन
एक साधारण
भुइँ मान्छे
त्यसपछि
आनन्द नै आनन्द
मुस्कान नै मुस्कान
सर्वशान्ति
सही निर्णय
बेलैमा गरिएछ !
सन्तान ढुक्क
अब
केही कुराको ठेकेदार बनिन्न !
दुर्जनलाई आफ्नो भनिन्न
अब
पोस्टहरू गनिन्न।
सही निर्णय !!

०००
चितवन