नेपाली हास्यव्यङ्ग्य अनलाइन पत्रिका

दीनानाथ पोख्रेल :

नौलो शिल्पी कलाको सडक मन चुनोस् भोकतिर्खा धपाओस् ।
कर्मी बाटो समाऊन् मनुजमन खुली सौख्य खम्बा समाओस् ।।
लड्दै भिड्दै क्रियाले भवन सुख पुगोस् हाँस्छ धर्ती विचारी ।
बाबाआमा रमाऊन् हरदिन घरमा मिल्छ उल्लास भारी।।२६।।

डाँडापाखा लगाऊँ नव तरु लतिका पूर्ण हाँसून् कलाले ।
गाऊन् गाना हियाका अतुल रस भरून् हर्ष पोखून् भेलाले ।।
अर्काको ध्वंश सोच्ने मनुजमन नहोस् वक्ष फ्याँकोस् कटारी ।
बाबाआमा रमाऊन् हरदिन घरमा मिल्छ उल्लास भारी ।।२७।।

भ्रष्टाचारी निमोठूँ सुकृत पथ चुनी बाँच्न सक्नेछु सोचूँ ।
मान्छे सन्मार्ग लागून् मुलुकहित क्रिया कर्मले भव्य पोखूँ ।।
धर्तीमा बढ्छ शोभा प्रगतिपथ हिँडूँ खुल्छ बाटो विचारी।
बाबाआमा रमाऊन् हरदिन घरमा मिल्छ उल्लास भारी।।२८।।

भर्दै सत्कर्म पाना फल घर म हुलूँ खुल्छ सायुज्य द्वार ।
मान्छेझैँ कर्म पोखूँ अवनितल खुलोस् प्राप्ति पस्कन्छ सार ।।
मान्छेले तुच्छ गन्लान् मन गम म गरूँ दिव्य आँखा उघारी ।
बाबाआमा रमाऊन् हरदिन घरमा मिल्छ उल्लास भारी।।२९।।

पुर्खाको फूलबारी मुलुक मन बुझोस् कर्म खुल्छन् सुनौला ।
हाँस्नेछन् माल पाखा तरु अनि लतिका फूल बोकून् सुनौला ।।
आऊन् नेपाल हेर्ने मनुजमन लिई गीत गाऊन् विचारी ।
बाबाआमा रमाऊन् हरदिन घरमा मिल्छ उल्लास भारी।।३०।।

०००
इलाम नगरपालिका वडा नं ०२, इलाम