नेपाली हास्यव्यङ्ग्य अनलाइन पत्रिका

रामशरण न्यौपाने :

हुन् जून घामसरिका बहुतै पियारा
खप्दै बढुन् प्रखर ताप र शीतधारा
जाडो हुँदा सिरक कम्बलमाथि खापून्
माता पिता शिशिरका सय घाम तापून्॥१

नेपालको प्रकृति यो सब बुझ्नलाई
सम्पूर्ण उत्तम धरोहर तीर्थ धाई
सक्छन् हिमाल र पहाड मधेस नापून्
माता पिता शिशिरका सय घाम तापून्॥२

सङ्घर्षमा विगतका दिन जो बिताए
नेपालको र जनको हित जो चिताए
त्यो स्वर्णअक्षर कुँदीकन कीर्ति छापून्
माता पिता शिशिरका सय घाम तापून्॥३

कच्चा छ देह नरको घटतुल्य एक
बाधा र विघ्न नपरुन् तनमा अनेक
लागेर रोग नगलून् भयले नकाँपून्
माता पिता शिशिरका सय घाम तापून्॥४

ऊर्जा थपे जति रचेर गृहस्थ जाती
पछ्याउँदै सब हिँडून् प्रिय पुत्र नाति
आफ्ना रिवाज जति सुन्दर छन् नहापून्
माता पिता शिशिरका सय घाम तापून्॥५

०००
भक्तपुर