नेपाली हास्यव्यङ्ग्य अनलाइन पत्रिका

दीनानाथ पोख्रेल :

आऊन् कष्ट तुषारतुल्य भवमा बाटो समाधानको ।
दिन्छन् योग्य लिए खुली मनुजले सद्भावका धारको ।।
भाग्छन् कष्ट हुरी तुषार पथका सत्प्रेम राखी चुने ।
पाका ईश्वर रम्दछन् अवनिमा मान्छे विवेकी बने ।।६१।।

भाका , भूल गरी स्वयम् पर सरे सङ्कष्ट बढ्छन् भरे ।
पाको बुद्धि सपार्छ कृत्य हितको जानूँ म खोजी गरे ।।
चिन्तास्रोत निमोठ्न सक्दछु स्वयम् छन् ज्ञान खोजेँ भने ।
पाका ईश्वर रम्दछन् अवनिमा मान्छे विवेकी बने ।।६२।।

आऊन् कष्ट अनेक भिड्दछु स्वयम् ऊर्जा छ उल्लासको ।
खुल्छन् ज्येष्ठ उमेर बोल्दछ बुता सामर्थ्यको ज्ञानको ।।
मिल्छन् वृद्ध पुजेर ज्ञान युगका सन्मार्ग सच्चा खने ।
पाका ईश्वर रम्दछन् अवनिमा मान्छे विवेकी बने ।।६३।।

अग्ला साहस खुल्दछन् डगरमा छन् वृद्ध साथै भने ।
टन्टा, ताप,तनाव छैन दिलमा सङ्कष्ट टाढा बने ।।
उम्दा हर्ष मिलेर रम्दछु म ता सन्मार्ग सङ्लो खने ।
पाका ईश्वर रम्दछन् अवनिमा मान्छे विवेकी बने ।।६४।।

आऊन् साथ युवा लिई कृत कला बाँडेर रम्नेछु म ।
भावी काल उचाल्न शास्त्र अघिको पस्केर जम्नेछु म ।।
त्यागी सक्रियता बसी भवनमा के मिल्छ अल्छी बने ?
पाका ईश्वर रम्दछन् अवनिमा मान्छे विवेकी बने ।।६५।।

०००
सुम्बेक, इलाम नगरपालिका वडा नं ०२, इलाम