नेपाली हास्यव्यङ्ग्य अनलाइन पत्रिका

जगदीश्वर पाेखरेल :

आफ्नै धर्तीमा रगत पसिना पोख्न इच्छा घटेरो ।
आफ्नै बस्तीमा टलटल हुने पोत्न सक्छौँ कमेरो ।।
भोका नाङ्गा छन् मनुज बिचरा खान देऊ हँसाऊँ ।
आमाबाबाका शुभ वचनले यो जगत् जित्न पाऊँ ।।१

सेवा गर्ने हो असक जनको हर्ष मान्छन् अपार ।
दुर्छे बानी त्यो अपसगुन हो गर्न सक्छन् सुधार ।।
आफ्नै पुर्खाको शिर शिखर यो स्वच्छ पर्दै उठाऊँ ।
आमाबाबाका शुभ वचनले यो जगत् जित्न पाऊँ ।।२

ऊर्जा बेच्ने हो भरभुवनमा देश नेपाल साँच्न ।
पानी मथ्ने हो झलल बिजुली सक्छ नेपाल हाँस्न ।।
हीराको छानो गिरिशिखर हो स्निग्ध पार्दै सजाऊँ ।
आमाबाबाका शुभ वचनले यो जगत् जित्न पाऊँ ।।३

आफ्नै धर्तीको उपज रसिलो गर्न निर्यात सक्छौँ ।
स्वार्थी छोरा हौँ पर मुलुकमा स्वार्थमा झुक्न पुग्छौँ ।।
जेन्जी पुस्ताका युवक युवती शक्ति आफ्नो जगाऊँ ।
आमाबाबाका शुभ वचनले यो जगत् जित्न पाऊँ ।।४

जन्मे हुर्केको जग जमिनमा नित्य पूजा गरेर ।
माया गर्ने हो हृदय छ सफा स्नेह वर्षा छरेर ।।
खस्रोमस्रो होस् फल फसलमा भोक तिर्खा रमाऊँ ।
आमाबाबाका शुभ वचनले यो जगत् जित्न पाऊँ ।।५

०००
हाल- क्यालिफोर्निया