नेपाली हास्यव्यङ्ग्य अनलाइन पत्रिका

होम सुवेदी :

न त अनुग्रह छन् न त प्रीत छन्
मुलुकमा अहिले नवरीत छन्
सब युवा परदेश गएपछि
अधिक ज्येष्ठ यहाँ भयभीत छौँ ।१

मुलुक फेरि जलेपछि दन्दनी
सुपरिवेक्षण छैन कतै पनि
छ घर यो जडको परिवेशमा
युवक छन् अहिले परदेशमा ।२

अधिक वृद्धहरू अनुरक्त छन्
जनक वा जननी रुन सक्तछन्
घर भुलेर युवा युवतीहरू
गलित संस्कृतिका अति भक्त छन् ।३

जनक छन् अहिले अपहेलित
मुलुकबाट छ शान्ति पलायित
स्वजन नै नहुँदा अति दीन छन्
जनक सन्ततिबाट विहीन छन् ।४

अब तुरुन्त सुरक्षण थालियोस्
मुलुकबाट कुकर्म निकालियोस्
मुलुकभित्र रहोस् जनवैभव
सकल वृद्ध सुरक्षित हुन् अब ।५

युवक शासन गर्दछु भन्दछन्
घर चलाउन ती अति मन्द छन्
कृषक, शिक्षक, डाक्टर हो अब
सफल दक्ष बनौँ सबका सब ।६

०००
भद्रपुर, झापा