नेपाली हास्यव्यङ्ग्य अनलाइन पत्रिका

आत्माराम न्यौपाने :

चरा आए जोडी साँझमा बोटबाट
मिठो बोली बोले चिर्बिरे कण्ठबाट
`तिमी सन्चै हौला, बाबु-आमा कसो छन्
मिलेका साथी झैँ वृद्धवृद्धा सँगै छन् ?´१

अनौठो झैँ लाग्यो प्रश्न यस्तो सुनेर
कसो छन् बा-आमा भन्न लागेँ गुनेर
डराए झैँ बोलेँ `सन्च छन् है ! ठिकै छन्
मिलेका साथी झैँ वृद्धवृद्धा सँगै छन् ।´२

चरा उड्दै लागे बोटमै भुर्र भुर्र
सँगै हाँस्तै खेल्दै जिस्किँदै चिर्रबिर्र
चराका जोडी झैँ लाग्छ आमाबुबा छन्
मिलेका साथी झैँ वृद्धवृद्धा सँगै छन् ।३

चराको जोडीको उक्त नौलो प्रसङ्ग
अझै सोची बस्ता हुन्छु केही झसङ्ग
चरा देख्नासाथै आज सम्झिन्छु झन् झन्
मिलेका साथी झैँ वृद्धवृद्धा सँगै छन् ।४

०००