नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे” :

मायाको झरना छ भित्र दिलमा सन्तानका खातिर
धाने भव्य गृहस्थ उच्च श्रमले मान्दैनमानी पिर
शोकाएर मरेभने यदि दुवै को पिण्ड देला चिता?
छोरो जान विदेश आतुर भयो छोडेर माता पिता॥१

लाग्छन् भित्र अनेक रोग नरमा पाको हुँदा देह यो
गाह्रो पर्दछ वृद्धले बल गरी धान्नै पनि गेह त्यो
कल्ले गर्छ हरे! बसेर घरमा ती वृद्धको सन्चिता
छोरो जान विदेश आतुर भयो छोडेर माता पिता॥२

साठीमाथि पुग्यो उमेर पनि त्यो गल्दैछ देही हरि
सक्दैनन् धरबार धान्न बिचरा त्यो भात पानी गरी
बाँझो बस्दछ खेत हाय मुखमा लाग्ला कसोरी सिता?
छोरो जान विदेश आतुर भयो छोडेर माता पिता॥३

जो जान्छन् घर फर्किने मनसुवा गर्दैन कोही पनि
बस्छन् हो सब खास नागरिकता बोकी उतैको अनि
फर्किनन् पछि पुत्र यो मुलुकमा गर्दा सयौँ ताकिता
छोरो जान विदेश आतुर भयो छोडेर माता पिता॥४

माटोको ऋण तिर्न भुल्छ मनुवा गिर्दा धनैमा जब
बेची रक्त बनेर दास परको गुज्रिन्छ चोला तब
हुन्छन् वृद्ध उतै कडा श्रमगरी लोर्के गएका ठिटा
छोरो जान विदेश आतुर भयो छोडेर माता पिता॥५

०००
चा. ना. पा.३ दुबुलाँपू, भक्तपुर