नेपाली हास्यव्यङ्ग्य अनलाइन पत्रिका

दीनानाथ पोख्रेल

समस्त संसार विचित्र खुल्दछ ।
र वक्षभित्रै भव पूर्ण डुल्दछ ।।
हियार खोली छिर दिव्य द्वारमा।
नसम्झ सासू किन बन्दिनन् मुमा ?०१॥

सुशान्त नारी घर पुज्दछिन् सधैँ ।
उदात्त बन्छिन् कृत पक्रिई सँगै ।।
विकार फ्याँक्छिन् कृतका सुधारमा ।
नसम्झ सासू किन बन्दिनन् मुमा ?०२।।

विकार मान्छे मनभित्र बस्दछ ।
सुभाव फ्याँकी खलभित्र कस्दछ ।।
सुधार ल्याऊँ हितका विचारमा ।
नसम्झ सासू किन बन्दिनन् मुमा ?०३॥

बुझाइले पार्दछ नित्य भिन्नता ।
बुझाइ होस् सुन्दर खुल्छ कृत्य ता ।।
बुझेर धोऊँ मल छन् हियारमा।
नसम्झ सासू किन बन्दिनन् मुमा ?०४।।

विचारका धार सुधारमा जमून् ।
सुधारका हार हियारमा रमून् ।।
उठून् बुहारी शुभ कृत्य मार्गमा ।
नसम्झ सासू किन बन्दिनन् मुमा ?०५।।

०००
सुम्बेक, इलाम