नेपाली हास्यव्यङ्ग्य अनलाइन पत्रिका

वाचकजी आज्ञा गर्नु हुन्छ, हे पीडित हो यो अरण्य देशको कथा हो ।

कुनै समय थियो, अरण्य देशमा शेर राजा हुने गर्दथ्याे । बाघ प्रधानमन्त्री, चितुवाहरू मन्त्री, ब्वाँसाहरू राज्यमन्त्री र हुँडारहरू सहायकमन्त्री हुन्थे । जति चित्त दुखे पनि स्यालहरू विभाग वा आयोगका प्रमुखमा चित्त बुझाउँथे । सबैले आआफ्नो औकात अनुसारका शाकाहारी प्राणीको शिकार गर्थे । खान्थे र रमाउँथे ।

अकस्मात अरण्य देशमा एउटा गजबको घटना घट्यो । देख्दा ठ्याक्कै स्यालजस्तो तर नीलो वर्णकाे एउटा प्राणीले शेरको तानाशाही बिरुद्ध ब्वाँसा, हुँडार र स्यालहरूलाई उक्स्याउन थाल्यो । आखिर यत्रो जङ्गलराजमा तिम्रो के छ र ? सिंह र बाघले नतुरेर छोडेको सिनो लुछ्ने त हौ तिमीहरू । म विदेशबाट प्रशिक्षित तथा नश्ल सुधारिएको तिमीहरूकै सगोत्री हुँ । मलाई विश्वास गर र साथ देऊ । अरण्यदेश तिमीहरूको मुठ्ठीमा हुनेछ ।

भद्र सहमति भएको मध्यराति कुनै डाँडामा नीलो स्यालले हुइँया गर्दै आन्दोलनको घोषणा गर्‍यो । स्याल हुइँया फैलिँदै फैलिँदै अरण्य देशब्यापि भयो । बाघले सोंच्यो सिंहलाई धपाउन सके अरण्य देशको मालिक आफू हुनेछ । चितुवाले सोंच्यो उ, प्रधानमन्त्री हुनेछ । ब्वाँसा र हुँडारले पनि पदोन्नति सोंचे र नीलो आन्दोलनमा गोलवद्ध भए ।

बुढो शेर चुपचाप गुफा पस्यो ।

आन्दोलनकारीको महासम्मेलनले अरण्य गणतन्त्रको घोषण गर्‍यो र नीलो मसीले गणतान्त्रिक विधान लेख्यो ।

त्यस उपरान्त अरण्य देशको नाइके चुनावद्वारा निर्वाचित हुन थाल्यो ।

अरण्य देशको विधान अनुसार बहुमत कसैको पुग्दैनथ्यो । अनि नीलवर्णीहरू गठबन्धन गर्थे । स्याल प्रजाति चतुर थियो । कहिले बाघको र कहिले चितुवाको पछि लाग्थ्यो ।

चुनाव आउँथ्यो । मांशाहारी प्रजातिहरू दुई तीन गुटमा गठबन्धन गर्थे र सरकार चलाउँथे । चलाइरहेका छन् ।

विधान अनुसार अब फेरि पनि चुनाव हुनेछ ।

मांशाहारी प्रजातिहरूको फेरि पनि गठबन्धन हुनेछ । अघिल्ला चुनावहरूमा जस्तै शाकाहारी प्रजातिका मृग, हरिण, जरायो र खरायोहरू तिनै मांशाहारी मध्ये कुनैलाई भोट हाल्नेछन् र पहिलेजस्तै मांशाहारीको आहारा बनिरहने छन् ।

इतिश्री अरण्यदेशे चुनावाेअध्याय । कथा बाचकले कथा टुङ्ग्याउँदो भयो ।