नेपाली हास्यव्यङ्ग्य अनलाइन पत्रिका

एकादेशमा एउटा राजाका तीनजना छोराहरू रहेछन । राजा बुढा हुँदै गएकोले राज्यको कार्यभार कुनै उनी एउटा छोरालाई सुम्पिन चाहन्थे । तर कुन छोरालाई राज्य सुम्पिदा राज्यको सुरक्षा र विकास होला भनि जाँच गर्न मन लागेछ ।

यसै उद्देश्यका लागि राजाले विभिन्न उन्नत जातका फलफूलका तीन बोरा बिउ दरबारमा झिकाएर छोराहरूलाई बाँड्दै भनेछन्- “बाबु हो, तिमीहरूले आ-आफ्नो भागको यो बिउलाई जतन गरिराख्नू । म भोलि नै दुई तीन बर्षका लागि तीर्थ गर्न जाँदैछु, फर्किएर आएपछि लिउँला ।”

राजा तीर्थाटनका लागि निस्किए ।

तीन वर्षपछि राजा तीर्थबाट फर्किएपछि छोराहरूलाई बोलाएर सोधे- फलफूलका बिउहरू तिमीहरू ककसले के के गर्यौ ? मलाई जानकारी देऊ ।

जेठो छोराले भनेछ- “भण्डार कोठामा राखेको छु । हेर्न सवारि होस् बुवा । उसले राजालाई बिउ राखेको कोठामा
लगेछ । कोठाको ढोका खोल्नासाथ ह्वास्स नमीठो गन्ध आएछ । बोराभित्रको सबै बिउ कुहिएर गन्हाई सकेको । यो दृश्य देखेपछि बाबुले सोचेछ कि यसको हातमा राज्य सुम्पियो भने राज्य पनि यसैगरि कुहिनेछ । राजा यो निष्कर्षमा पुगेछन् ।

त्यसपछि माइलो छोरालाई सोधेछन् । उसले भनेछ- “राखि रहँदा कुहिएला भनि मैले बेचिदिएँ ।” उसको कुरा सुनेपछि राजाले सोचेछन्- यसको हातमा राज्य सुम्पियो भने यसले राज्य नै बेच्ने रहेछ ।

त्यसपछि कान्छो छोरालाई त्यही प्रश्न सोधेछन् । उसले हराभरा बगैँचामा लगेर देखाउँदै भनेछ- हजुरले दिएको बिउ उमारेर बिरुवा मैले फलफूलका बिरुवा हुर्काएँ । ल हेर्नुहोस् कोही फुल्न लागेका छन्, कोही फल्न लागेका छन् ।

हराभरा, झकिझकाउ सुन्दर बगैंचा देखेपछि राजा खुसीले गदगद भएछन् र भनेछन्- यसको हातमा राज्य
सुम्पियो भने मेरो राज्य अवस्य पनि यसैगरी फल्नेछ, फुल्नेछ । राजा यो निष्कर्षमा पुगेछन् ।

अहिले हाम्रो देशमा थुप्रै नेताहरू छन्, कुन नेताले देश सडाउँछ, कुनले बेच्छ र कुनले फुलाउँछ फलाउँछ त्यसको पारख राम्रो सङ्ग गर्नुपर्ने ठूलो चुनौती हाम्रो अहिले हाम्रो सामु खडा भएको छ । राम्रोसँग जाँचबुझ नगरिकन छोरी दियो भने छोरीको जीवन बिग्रिन्छ । मतदान गर्दा पनि यदि हाम्रो मत कुपात्रमा पर्यो भने देश कुहिन्छ या त बिक्री हुन्छ । अस्तु ।

ललितपुर