नेपाली हास्यव्यङ्ग्य अनलाइन पत्रिका

साँढे जुधाइको आयोजना भयो । जित्नेलाई सम्राट घोषणा गर्ने नियम थियो ।

बोकालाई पनि सम्राट हुने लोभ पलायो । बोकाले साँढेसँग जुधाइमा भाग लिने प्रस्ताव गर्यो ।
साँढेसँग जुध्ने बोकाको प्रस्ताव सुनेर साँढेहरु गलल्ल हाँसे । बोकालाई पागलको संज्ञा दिए ।
बोको पागल भनिन तयार भयो, तर प्रतिस्पर्धाबाट पछि हटेन ।

साँढे र बोकाको जुधाइ भयो ।
जुधाइमा जित बोकाको भयो । तर रेफ्रीले बोकालाई विजेता घोषणा गर्न मानेन । खेलको नाम नै ‘साँढे जुधाइ’ भएकाले बोकालाई विजेता घोषणा गर्न कानून बाधक रहेको तर्क रेफ्रीले गर्यो । त्यसोे भए नाम परिवर्तन गरेर पुनः जुध्ने प्रस्ताव बोकाले राख्यो ।

दोस्रो पटक फेरि ‘साँढे-बोका जुधाई’ नाम राखेर जुधाइ सुरु भयो । जित पुनः बोकाको भयो । यसपटक पनि रेफ्रीले बोकालाई विजेता घोषित गरेन । रेफ्रीले भन्यो- “‘यो बोका-साँढे जुधाई’ भएन, बरु ‘साँढे-बोका जुधाई’ भयो । त्यसैले बोकालाई विजेता भन्न मिलेन ।”
तेस्रो पटक अब ‘बोका-साँढे जुधाई’ नाम राखियो र जुधाई सुरु भयो । यस पटक पनि बोकाले नै जित्यो । रेफ्रीले भन्यो दुनियाँमा साँढेको जुधाइ पो हुन्छ, बोका र साँढेको जुधाई कहाँ हुन्छ ? कतै संसारमा बोका र साँढे जुधेको र बोकाले जितेको कसैले सुनेको छ ? छैन भने जित फेरि पनि साँढेकै भयो ।

“त्यसो भए मैले विजेता घोषित हुन के गनुपर्छ ?” बोकाले सोध्यो ।
“खेलको नियम परिवर्तन गर्नुपर्छ । यो नियम भगवानले मात्र परिवर्तन गर्न सक्छन् ।” रेफ्रीले भन्यो ।

बोको शक्तिस्वरुपा देवीको शरणमा पुग्यो । देवीको मूर्ति अगाडि जित्ने याचना गर्दै लम्पसार परेर बोकाले भन्यो- “भगवान ! मैले युद्ध जितेँ, तर नियममा मलाई विजेता घोािषत गर्न नमिल्ने रहेछ । मलाई विजेता घोषित गर्न मिल्ने गरी नियम परिवर्तन गरिदिनुपर्यो ।”

बोको आफैँ आएर शक्तिकी प्रतीक देवीको अगाडि लम्पसार परेको मनुष्य उपमा पाएको प्राणीले देख्यो । मनुष्य दंग पर्यो । उसले तुरुन्तै बोकाको घाँटीमा हतियार चलायो । बोको परमधाम भयो ।

प्रतिस्पर्धी नै पर गएपछि साँढे स्वतः विजेता घोषित भयो । साँढे विजेता मात्र घोषित भएन, सम्राट समेत घोषित भयो ।

शासन साँढेको, आसन साँढेको, भासन साँढेको, रासन साँढेको । सबै साँढेको भयो ।
साँढेकै साम्राज्य, साँढे नै सम्राट । संसारमा साँढेको शासन चलिरह्यो ।

काठमाडौं