नेपाली हास्यव्यङ्ग्य अनलाइन पत्रिका

देश सम्मानमय भएको छ । जताततै सम्मानको लहर चलेको छ । कसैले सम्मानित हुने काम गरेपछि त्यस्तालाई सम्मान त गर्नैपर्यो । सम्मान गर्नु सोह्रै आना राम्रो कुरा हो । त्यही राम्रो भएकाले त दिनमा ८/१० वटा सम्मान कार्यक्रम चलेकै हुन्छन् । ३/४ दर्जन जति सम्मानित भएकै हुन्छन् । यही सम्मान कार्यक्रमले गर्दा त कतिले रोजगार पाएका छन् । सम्मानित हुनेले सम्मानको आयोजकलाई दिने सहयोगले सम्मान आयोकको गुजारा चलेको छ । सम्मान प्रमाणपत्र छाप्नेको आम्दानी बढेको छ । सम्मानको दोसल्ला बेच्नेदेखि फूलमाला बेच्नेसम्मले आम्दानी गर्न पाएका छन् । कार्यक्रम आयोजना गरिएका होटल र पार्टी प्यालेसहरूले पनि आम्दानी बढाएका छन् । त्यहाँ काम गर्ने मजदूरहरूको रोजिरोटीमा पनि केही योगदान पक्कै पुग्ला । उता यस्ता कार्यक्रममा एक घण्टा ढिलो पुग्ने कार्यक्रमको प्रमुख अतिथि विशेषणधारीको पनि मानभाउ वृद्धि नै होला । सम्मान पाउनेको त नाक ठूलो हुने नै भयो । यसरी जतातिरबाट हेर्दा पनि कतै वेफाइदा नदेखिने सबैतिर फाइदा नै फाइदा देखिने काइदाको कामलाई बढवा नदिएर भयो ? आउनुस् आउनुस्, सम्मान गरौँ ।

आजकल साहित्यकार सम्मान, कलाकार सम्मान, सस्कृतिकर्मी सम्मान, अधिकारकर्मी सम्मान, अभियन्ता सम्मान, नागरिक सम्मान, समाजसेवी सम्मान, राजनीतिक सम्मान, आर्थिक सम्मान, कानूनका सम्मान । यी बजारका चलनचल्तीका सम्मान । आजकल कुन क्षेत्रमा छैन सम्मान ? राम्रो कुरा हो, यस्ता संसार हाक्नेहरूलाई सम्मान नगरी हामी नेपाली भएर जन्मेको के अर्थ र ? नेपालीको संस्कार नै हो नि, पाहुनाको स्वागत र ठूलाबडाको सम्मान । आउनुस् सम्मानलाई अझ तीव्रता दिउँ, हाम्रो संस्कारलाई थप मजबुत बनाऊँ ।

यस्ता विश्व व्रह्माण्ड नै हाँकेका व्यक्तिहरू सम्मानित हुँदा को खुसी छैन ? धरतीपुत्रले पाएका यिनै सम्मान देखेर त धरती पनि हाँसेको छ । विश्व ब्रह्माण्ड चलेको छ, विहान सूर्य उदाएको छ, रातमा चन्द्रमा लागेको छ । सायद यी सम्मानहरू नगरिँदा हुन् त पृथ्वी घुम्न रोकिन्थ्यो होला, धर्ती रसातलमा भाषिन्थ्यो होला । आकाशमा चन्द्र र सूर्य देखिँदैनथे होला । चराचर जगत यही सम्मानमा त अडेको छ । त्यसैले सम्मान कार्यक्रमलाई प्रबद्र्धन गरौँ । पृथ्वीमा जन्मेपछि महानहरूको सम्मान गरेर मान्छे हुनुको जिम्मेवारी पूरा गरौँ ।

सम्मान हुनु बहुत बढिया बात छ । तर अझै पनि खास सम्मान गर्नुपर्ने भने छुटेका छन् । तिनलाई पनि सम्मान गरेर बातलाई अझ बढिया बनाउनु छ । आउनुस् आउनुस्, थप सम्मानको घोषणा गरौँ ।

बाटोमा फोहोर फालेर आफ्नो घर सफा राख्नेलाई उत्कृष्ट फोहोेर विसर्जक सम्मान दिऊँ । कुकुर पाल्ने र हगाउन बाटोमा लैजानेलाई कुकुर सम्मान किन नदिने ? भ्रष्टाचार गरेर जम्मा गरेको सम्पत्तिले ठूलाठूला निजी महल ठड्याएर सहरलाई सभ्यताको परिचायक बनाउनेलाई सभ्यता सम्मान दिनुपर्छ । कानून मिच्ने धूर्तलाई बठ्याइँ सम्मान प्रदान गर्नुपर्छ । बाटो मिच्ने र सरकारी जग्गा हडप्नेहरू हडपा सम्मानका लागि योग्य छन् । बलात्कारी भनिएकाहरू नारी सौन्दर्यका पूजारी हुन् । तिनले सौन्दर्य सम्मान पाउनुपर्छ । राजनीतिमा दलाली गर्ने पनि शेयर दलाली जस्तै सम्मानित हुनुपर्छ, वरिष्ट दलाल सम्मान पाउनुपर्छ । बजारमा देखिएका लफङ्गा, गुण्डा, लुटाहा, फटाहा सबैले आफ्नो योगदान अनुसारको सम्मान पाउनैपर्छ । किन कि, यो देश हिजो यिनैले बनाए, आज यिनैले बनाइरहेका छन् । भोलि पनि बनाउने यिनैले हुन् ।

अहिलेसम्म जति पनि सम्मान कार्यक्रम भएका छन् ती निजी क्षेत्रले गरेका छन् । अब यिनलाई सम्मान चाहिँ सरकारले गर्नुपर्छ । खर्च राज्य कोषबाटै हुनुपर्छ । त्यसो भयो भने मात्र जनताले तिरेको करको हिस्सा त्यो सम्मानमा पर्छ र जनताले पनि त्यो सम्मानमा अपनत्व महसुस गर्छन् । यस्ता महानहरूलाई सम्मानित गर्ने ठाउँमा आफ्नो पसिनाको थोपो भए पनि परेकोमा जनता धन्य हुनेछन् ।

आउनुस्, अब कत्ति पनि ढिला नगरी यस्ता नयाँनयाँ सम्मानको स्थापना गरौँ । यस्ता महान देश निर्माणकर्तालाई सम्मान गरेरर देश निर्माणमा हामीले एक थोपा भए नि योगदान पुर्याऊँ । बेलैमा उनीहरूको सम्मान गरिएन भने उनीहरूको देश निर्माण गर्ने जाँगर घट्ला र देश डुब्ला है !!!

०००
मोबाइल : ९८५१०५३१२७