नेपाली हास्यव्यङ्ग्य अनलाइन पत्रिका

खान्की पचाउने शरीरको भित्री आन्द्राभूँडीसहितको पार्टपुर्जालाइ पाचन प्रणाली हो भन्ने बुझेको छु मैले । खसी, बोका, कुखुरा, हाँसको पाचन प्रणाली नजिकैबाट नियालेको एक मनुवा हुनुको हैसियतले यति भन्न सक्छु कि मान्छेको पाचन प्रणाली तात्विक रूपमा ती पशुपंक्षीको भन्दा फरक छैन ।

पाचन प्रणालीको रूपरेखा सबै मान्छे मात्रको एकैनासको हुन्छ । कसैको जठराग्नी बलियो होला कसैको कमजोर त्यो अलग पाटो हो ।

पाचनप्रणाली कमजोर हुनेले घिउ त परै जाओस् च्याउ पनि पचाउन सक्दैन । जस्तो खायो त्यस्तै निस्कन्छ निष्कासन यन्त्रबाट । साग खायो भने फेरि अर्को छाकलाई पुग्ने गरि साग निस्कन्छ, भात खायो भने भात नै ओकल्छ दुबै मुखबाट । अन्न सागपात फलफूल पचाउने क्षमतै हुँदैन । मान्छे पिलन्धरे हुन्छ , ख्याउटे हुन्छ, च्याउमुखे हुन्छ । फु गर्दा ढल्ने खालको हुन्छ, जोडले हु गर्दा तर्सने खालको हुन्छ रातीमा भेट्दा तर्साउने खालको हुन्छ ।

बलियो पाचन प्रणाली भएको मान्छेको त के कुरा गरौं । ऊ त शोले फिलिमको गब्बर सिंह जस्तै जब्बर हुन्छ । हठिलो गठिलो ज्यान भएको हुन्छ । पुरुष हो भने राजेस हमाल जस्तो फुर्तिलो हुन्छ, महिला हो भने सन्नी लियोन जस्तो भरिलो ज्यान भएको हुन्छे । हिजो आज दुर्लभ मानिएको पियोर दूध, घिउ पचाउने क्षमता हुन्छ । नयाँ गहुँको रोटी सजिलै पचाउँछ उसले । छिप्पेकोको च्याङ्ग्रा बोका राँगाको सुकुटी पचाउन सक्दछ उसले । किनकी जठराग्नी मजबुत छ उसको । जे खाए पनि मलमा रुपान्तरित गर्न सक्छ उसले ।

कसैकसैको पाचन प्रणाली यति मजबुत हुन्छ कि उसले देशका उद्योग कलकारखाना, नदिनाला, प्राकृतिक साधन स्रोत नै पचाइदिन सक्छ । राष्ट्रियता, सम्प्रभूता, अखण्डता पचाइदिन सक्छ । क्वीन्टलका क्वीन्टल सुन पचाइदिन सक्छ । राष्ट्रको ढुकुटी पचाइदिन सक्छ । लाज पचाइदिन सक्छ, घिन पचाइदिन सक्छ । साझा यातायात पचाइदिन सक्छ, वायुसेवा निगम, आयल निगम आदि इत्यादि पचाइदिन सक्छ ।

पाचन प्रणाली न हो मजबुत भएपछि कसको के लाग्यो र ? आस्था विश्वास भरोसा पचाइदिन सक्छ । नियम कानून विधि बिधान पचाइदिन सक्छ । कुकृत्यहरू, अपराधहरू, अकर्मण्यता सबै पचाइदिन सक्छ । घोषणापत्रमा उल्लेख भएका कुराहरू पचाइदिन सक्छ । राशका राश आश्वासनहरू पचाइदिन सक्छ ।

पाचनप्रणाली मजबुत हुनेको इतिबृतान्त कहने हो भने उसले गिता जस्तो पवित्र ग्रन्थ छोएर खाएको सपथ पचाउन सक्ने ल्याकत राख्छ । दुखी पीडित जनताको पाउ परेर भोटको याचना गरेको दिनको मर्म पचाउने हैसियत राख्छ । ती दुखी पीडित जनको आँसु पचाउने क्षमता राख्दछ ।

पाचन प्रणाली मजबुत हुनैपर्छ । यसमा दुई मत छैन । यसो भन्दैमा घुस र कमिसनको खेती गरेर मुलुकनै पचाउने त ! आफ्ना भावी पिँढीहरूको इज्जत प्रतिष्ठा नै पचाउने त ! देश र जनताको भाग्य र भविष्य नै पचाउने त ! अहँ, यस्तो कृतघ्नता कसैले नगरोस् भन्ने कामना गर्न चाहन्छ यो भैरवेली ठिटो ।

०००
२०७९ मङ्सिर १६
सम्पर्कसूत्र : ९८६७२९१७४६