नेपाली हास्यव्यङ्ग्य अनलाइन पत्रिका

शेषराज भट्टराई :

हरेक कुरा बिग्रिन्छ । वनस्पति, बास, बेत बाङ्गिएर बिग्रिन्छ । बिग्रिनु, भत्किनु, थिग्रिनु चराचर जगतको कुरा हो । यसलाई स्वभाविक नै मानिन्छ । अस्वभाविक भन्ने तत्व पृथ्वीमा पाइदैन । बिग्रिन्छ यहाँ गर्भदेखि लिएर गर्व गर्न लायक मान्छेसम्म ।

नेपाल बिग्रिन्थेन भने सारा विश्व विकसित भइसक्दा नेपाल किन तलका तलै ? सिंगो सगरमाथा र गौतम बुद्धको नामले मात्रै नेपाल सप्रिएको ठहरिन्छ त ? सप्रिँदैन कहिल्यै नेपाल र नेपाली जबसम्म यिनको मति, विवेक, बुद्धि र गिदी सप्रिँदैन ।

नेपाली भाषा बिग्रिएर चौपट छ । बिग्रिएका नेताले चलाएको देश सिंगो राष्ट्र बिग्रिएर असरल्ल छ । दलका दास विहिन दुइटा नेताले देश बनाउने प्रयास गरिरहेका छन् । मेयर बालेनले काठमाडौं बनाउने प्रयास गरिरहेका छन् भने मेयर हर्क साम्पाङ राइले धरान बनाउने प्रयास गरिरहेका छन् । सारा फुटपाथे व्यापारी र फोहोरमैला सफा गरेर तिनका नजरमा बालेन बिग्रिनु बिग्रिएका छन् । हरेक काममा आफै खटेर हर्क साम्पाङ बिग्रिनु बिग्रिएका छन् । यसरी हाकाहाकी जनताको भलो गर्ने नेतालाई नेपालमा बिग्रिएको मान्छन् । तर यस्तै बिग्रिएको मान्छेको खाँचो खड्किरहेको छ नेपालमा ।

आज नेपालका न्यायालयहरू द्रव्य पीचास बनेर बिग्रिएका छन् । शिक्षालय, औषधालय, शौचालय, न्यायालय भएभरका सबै लयहरू बिग्रिंदा बिग्रिंदा विलय हुने अवस्थामा पुगिसकेका छन् । साँढे धेरै भए नेपालमा बिरालो धेरै भए नेपालमा थोत्रो घरमा मुसाको रजाई भएपछि अरू के आसा गर्नु । धेरै उम्लिएपछि पोखिन्छ । झुसी भएपछि पोखिन थाल्छ । बन्दाबन्दै बन्नै नसकेपछि बिग्रिन्छ । भन्दा भन्दै भन्नै नसकेपछि बिग्रिन्छ । सबैकुरा बिग्रिन्छ । गाडी बिग्रिन्छ, आधुनिक हातहतियारहरू बिग्रिन्छ । विवेक बुद्धि बिग्रिन्छ । दिन अनि मौसम बिग्रिन्छ । भनेजस्तो नहुँदा वर्षमात्र होइन वर्षौ बिग्रिन्छ । ज्यान बिग्रिन्छ । ध्यान बिग्रिन्छ । हिंड्दा हिंड्दैको खुट्टा र लेख्दा लेख्दैको कलम बिग्रिन्छ । चलिरहेको हाइवे बिग्रिन्छ । बगिरहेको नदी, खोलानाला बिग्रिन्छ । हावा, वायुमण्डल र अक्सिजन बिग्रिन्छ । चलाउँदा चलाउँदैको फेसबुक, नेट, चेट, सब बिग्रिन्छ भने मोबाइलले बालबालिकाहरू बिग्रिरहेका छन् । मान्छेबाट बनेको मान्छे किन नबिग्रिनु ? छोराछोरी बिग्रिन्छन् । श्रीमान श्रीमती बिग्रिन्छन् । घर व्यवहार बिग्रिन्छ । बैंक, सहकारी बिग्रिन्छ । बिग्रिंदा बिग्रिंदा धर्म, कर्म नै बिग्रिन थालेपछि लाज शर्म पनि बिग्रिन्छ र बिग्रिएका मान्छेलाई शर्म लाग्नै छोड्छ । शर्महारा, कर्महाराले जे गरे पनि हुन्छ । जति बिग्रिए पनि बिग्रिएको ज्यानको के प्रवाह । बिग्रिनु थिग्रिनु मानव विवेकमा भर पर्छ । व्यक्ति बिग्रिन्छ । समाज बिग्रिन्छ, वडा बिग्रिन्छ । नगर बिग्रिन्छ । जिल्ला बिग्रिन्छ । प्रदेश बिग्रिन्छ । अञ्चल बिग्रिन्छ । अति भएपछि देश बिग्रिन्छ ।

अहिले नेपालका ठूलाठूला नेताहरू बिग्रिएका छन् । नागरिकलाई अनाहकमा अनागरिक बनाएर सडिएका छन् । सक्कली नागरिकलाई नक्कली बनाएर गनाएका छन् । आफ्नै देशका जनतालाई बेचेर पूर्व गृहमन्त्री, उपप्रधानमन्त्रीले जेलनेल भोगिरहेका छन् । पाँच पटकसम्म देशको प्रधानमन्त्री भएको ठूला नेताका दुलही करोडौंको काण्डमा मुछिएका छन् । पूर्व गृहमन्त्रीकी श्रीमती करोडौं घोटलामा आरोपित छन् भने यहाँ भन्दा कति बिग्रिनु । देशका गन्यमान्य बिग्रिनु भनेको नेपाल देश बिग्रिनु हो । देश देश बिग्रिएर विश्व बिग्रिन्छ । अहिले उम्लिएर फत्फत् फत्किरहेका रुस र युक्रेन मारामार हुनुको कारण नै बिग्रिएर हो । मति भ्रष्ट भएपछि खति हुन्छ । मानवीय मूल्य र मान्यता नबुझेपछि अति भएपछि खति हुनु स्वभाविक मानिन्छ ।

राणा शासनकालमा जङ्गबहादुर राणाले शासन गरेर बिग्रिएका थिए । पञ्चायत कालमा शान्ति क्षेत्र घोषणा गर्न विरेन्द्र राजालाई बिग्रिएको मानेर नै उनको वंश विनाश गरे । अब एउटा कुन चाहिँ उपद्रयाहा बिग्रिएको गोबर गणेश आउँछ र गणतन्त्र नेपाल, प्रदेश खारेज गर्छ अनि बिग्रिएका बिग्रिएकाले हुलहुज्जत गर्दै बिग्रिएका मध्येबाटै एकजना प्रखर बिग्रिएकालाई अध्यक्ष बनाउँछन् र सोझा सिदा जनताबाट अकुत पैसा असुल्दै दस्तुर तिरेर सदस्यता लिन ह्वीप जारी गर्छन् । चाहिदा नचाहिंदा र चाहिंदो नचाहिंदो पगितो धनराशी कुम्ल्याएर जेल जान्छन् । वर्तमान गणतन्त्र नेपालमा जारी बिग्रिएकाको दैनिकी र जीवनचक्र यसरी नै चलिरहन्छ ।

बिग्रिन्छन् मान्छेहरू हरेक अवसर र अवतारमा बिग्रिन्छन् । कसैले बैंशमा सत्र हजार नेपाली जनतालाई स्वाहा पारे पनि अहिले पाप कटनी हेतु चारधाम गर्न चारपाउ टेकेर लागि परेका छन् । उनले भारतको एक मन्दिरमा गएर एकसय आठ किलो रुद्राक्षको माला र अकुत द्रव्यदान गरेर  बिग्रिनसम्म बिग्रिएका छन् । मान्छे अवस्था, अवसर र परिबन्धमा परेर बिग्रिन्छ । रहर, जहर र कहरमा परेर बिग्रिन्छ । सौख र शान खातिर बिग्रिन्छ । देखासिकी र सनकमा परेर बिग्रिन्छ । आफ्नो आदत अस्तित्व र अहंता देखाउन बिग्रिन्छ । केही गरेर देखाउँछु भन्ने मान्छे बिग्रिन हरदम तम्तयार भएर गौंडो गल्छेडो ढुकी रहेको हुन्छ । त्यसैले बिग्रिनलाई पानीले जस्तो प्वाल छिद्र खोजेर बस्नुपर्छ । हावाले जस्तो अक्सिजन बनेर प्राणीलाई बिगार्नु पर्छ र चट्याङ बनेर गड्याङ गड्याङ पड्किंदै धरा र बोट वृक्षको जरामा उर्जा बनेर पस्नुपर्छ अनि महामानव बन्न हुटहुटी, प्रेरणा र पौरखमा दागबत्ती दिनुपर्छ र भस्म लेपन गरेर आनन्द मान्दै बिग्रिनुपर्छ ।

अति बिग्रिएको मान्छेलाई नबिग्री भन्यो भने नराम्रो मान्छ । अर्ति दिनेलाई नै खराब भन्न थाल्छ । बिग्रिनु सप्रिनु पनि एक प्रकारको नसा हो । नसा भनेको लत हो । त्यसैले लतमा खत देखाउनु हानिकारक हुनसक्छ । डाँडावारी डाँडापारी गनाउने गरेर बिग्रिए पछि छि छि दुरदुरको सामना गर्न सक्नुपर्छ । हरेक प्राणी आ-आफ्नो स्वभाव अनुसार बिग्रिएका हुन्छन् । साहित्यमा लागेर लेखनाथ पौडेल, लक्ष्मीप्रसाद देवकोटा, भैरव अर्याल, वासुदेव लुईटेल, मेक्सिम गोर्की, घर व्यवहार नै नहेरी भरमार बिग्रिएका थिए । त्यसैले आजका विश्वविद्यालयहरूमा विद्यार्थीको अक्कलको ढोका खोल्न तिनै बिग्रिएका लेखकका जीवनचक्र घोक्रो दुखुन्जेल घोकी रहेका छन् । राजनीतिमा लागेर महात्मा गान्धी, नेल्सन मण्डेला, अब्राहम लिङ्कन, कृष्णप्रसाद भट्टराई, बिपी कोइराला, माओत्से तुङ, मदन भण्डारी बिग्रिएका थिए । आज संसारका उच्च शिक्षालयहरूमा उनै बिग्रिएका घनटाउकेहरूको जीवनगाथा पढ्दा पढ्दै त्यसरी नै आफू पनि बिग्रिने ताउरमाउर गरिरहेका छन् भनेपछि तपाइँ हामी सज्जन भनाउँदा त्यस किसिमले बिग्रिने कि नबिग्रिने ?

०००
फूलबारी-११, पोखरा, कास्की
फोन ९८०६६७७५९४