नेपाली हास्यव्यङ्ग्य अनलाइन पत्रिका

अन्जु शर्मा :

ऐया ! ठेलामा ठोक्किएर एक वृद्ध बाटोमा लडे । उनको हातको लठ्ठी हुत्तिएर पर पुग्यो ।

ठेलावालः कम्सेकम आँखा त हेरेर हिड्न पर्छ नि ! यस्तो महङ्गो फलफूल र तरकारी सबै भूइँमा पोखियो ।
वृद्धः बाबू ! बाटोमा ठेला नराखेको भए म पनि लड्ने थिइन, फलफूल र तरकारी पनि पोखिने थिएन ।

ठेलावाल: बाटोमा नराखेर तपाईंको घरमा राख्नु त ? म मात्रै पनि हैन ठेलामा पसल गर्ने । अनि पसल दर्ता गर,भाडा तिर, कर तिर । खानु चाहिँ के ? (निकै च्याँठिएर बोल्यो)
वृद्धः भाडा नतिरेको कारण तिमी सस्तोमा बेच्छौ, त्यो भाडा तिर्नेले तिम्रो दाममा दिन सक्तैन । अनि उसको व्यवसाय कसरी चल्छ ? उसको व्यवसाय नचले भाडा कसरी तिर्छ ? भाडा उठाउन नसके करोडौं पर्ने जग्गामा किन घर बनाउनु ? अनि त्यति मूल्यवान जग्गा बाटोलाई किन छोड्नु ?

ठेलावालः बढ्ता कुरा नगर बा ! खुरूक्क घर जाऊ ।

निकै विवाद चुलिएपछि नगर प्रहरीले ठेला उठाएर लग्यो ।
ठेलावालः हायः लुटेरो सरकारले मेरो सामन लुट्यो ।

ऊ चिच्याउन लाग्यो । ठेलावाल चिच्याएको सुनेर पत्रकार र बेरोजगारहरूको जमात भेला भयो । कसैले ठेलावाल ठीक भने कसैले बेठीक भने । सडक अतिक्रमण गर्ने बर्गले स्थानीय सरकार मुर्दावादको नारा लगाए । बाटोमा हिँड्ने बर्गले स्थानीय सरकार जिन्दावादको नारा लगाए ।

विश्लेषकहरू आगामी चुनाव कुन पक्षले बिजय हाँसिल गर्छ स्वयं अन्यौलमा परे ।

०००
रातोपुल, काठमाडौं