नेपाली हास्यव्यङ्ग्य अनलाइन पत्रिका

गाेपेन्द्रप्रसाद रिजाल :

अभिधा अर्थमा भुक्नु भनेको कुकुरको कराइ हो । ढुक्ने चाहिँ भर्सेलीमाथि न्यानु ताप्दै मालिक मालिक्नी जागेपछि भुक्नेले आची चाट्न नभ्याउँदै मालिक मालिक्नीको खुट्टामा म्याउँ म्याउँ गर्दै पुच्छर डोलाउँदै स्वादे जिब्रो फट्कार्ने बिरालो ब्राण्ड । बिरालो ब्राण्डमा मालिकका नाता गोता आफन्त आदि पर्दछ्न् । यस्लाई थन्क्याएर आज भने भुकाइ महात्म्य ।

भुकाइ नानाथरिका हुन्छ्न । कुनै भुकाइ महलको चौघेरा भित्र, देख्दै डरलाग्दो, घाँटीमा कुन जातको भुक्ने हो भन्ने परिचय खुल्ने फिता झुण्डिएको घ्वाङ्ग घ्वाङ्ग गर्दै थर्किने गरि , मालिकको रक्षार्थ खटिएको भुकाइ । जसले स्वनाम धन्य एकजोर हातले दस ठाउँ नमस्कार र बीस ठाउँ हात मिलाउँदै आफ्नु अनुकुल चाँजोपाँजो मिलाइ महल छिरेका नेता नेतीगणले पालेका दुई खुट्टे स्वाँठरुपि स्वानहरु । उनीहरुको धर्म-कर्म जे भने पनि आफ्ना मालिक बाहेक अरुलाइ झम्टन्छ्न् । निगाले चितुवाले बाख्राको पाठो झम्टिए झैँ ।

अर्को दुई खुट्टे भुकाइ सडकमा, गल्लीमा, चोकमा जिब्रोबाट पसिना चुहाउँदै; बिजुलीको पोल, फुलको बिरुवा, पोथ्रातिर तुर्क्याउँदै घोक्रो फुल्ने गरि भुक्ने भुकाइ । यिनीहरु आफ्नु मालिकको रक्षार्थ खटिएका झुण्डवाला हुन्छ्न । एउटा अगाडि लागेर भुकेपछि – पछि पछि त्यही भाका दोहोर्याउँदै निकै ठूलो भुक्नु यिनीहरुको कर्तव्य हो ।
बेला बेला अर्को अर्को मालिकले फुकाएका भुक्नेसँग भेट हुँदा चिथोरा चिथोर पनि चल्छ । उनीहरुको ज्यानमा सानू चोटमात्र लाग्यो भने कुईं —-कुइँ गर्दै भाग्न र माग्न भ्याउँछ्न् । यस्तो चोटमा निकै फाइदा हुने हुने भएकोले भुकाइ पनि निकै गतिलो हुन्छ । यिनै मध्येको जखमले भुकाइ नै पछि महलको फितामा बाँधिएर भुक्ने हो ।

अर्को हुन्छ ख्याउटे भुकाइ । जिउ भरी लुतो बोकेरै भए पनि मालिकको जुठोपुरोले भाग नपुगेर सडकको फोहोर र डङ्गुर खोस्रदै पेट फुलाएर घाँटीका नशा तन्काउँदै भुक्छ्न् । यस्ताको पहिलो लक्ष भनेको मालिकको आदेशमा भुक्न बढुवा हुनु हो । तर यस्तो भुकाइमा कहिलेकाहीँ प्रशासन रुपि रेविज लागेर सोत्तर पनि हुन्छ्न । यिनीहरुले देख्नै नहुने भनेको चाहिँ बोरा बोक्ने, ठेला चलाउँने, भकारो सोहोरेर जीवन धान्ने आदि आदि हुन् । नभुकी भगाउन वा झुकाउन सकिँदैन भन्ने यिनीहरुको मूल नीति र मार्गदर्शक शिध्दान्त पनि हो ।

अब भन्नुहोस- तपाईं हामी कुन किसिमको भुकाइमा पर्छौं ?

यो लेखोट पढेर कन्सिरी ताते – नाक खुम्च्याउँदै, जिब्रो फट्कार्दै, कान ठाडा पारेर झन थर्किने गरि भुक्नु होला । हात्तिलाई केही असर गर्दैन । जदौ !!!

०००
पाँचथर ।