नेपाली हास्यव्यङ्ग्य अनलाइन पत्रिका

केशवराज आमोदी :

जहाँ ढालियो युद्धले राजतन्त्र
त्यही गाडियो सानले लोकतन्त्र
रहेको छ कालो अझै हेर दाल
म खै के सुनाऊँ नयाँ हालचाल ? १

लगी गाडिदैमा कुनै वृक्ष हेर !
कहाँ गड्छ माटोबिना सत्य हेर !
छ ढल्दै यहाँ नक्कली दम्भ-तन्त्र
कहाँ टिक्छ थामी कतै भोगतन्त्र । २

‘कहाँ हुन्छ संस्कारको आज चर्चा-
कहाँ हुन्छ यात्रा भई शून्य खर्च ?’
झटारो नहानी कहाँ खस्छ आँप
बिना स्वार्थ थापिन्न व्यर्थै धराप । ३

उडाई गफैले सभामा हँसाई
खुदै व्यङ्ग्य मन्तव्य तिखो चलाई ।
लगाएर ताला कठै ! बोल्न दिन्नन्-
छ खाँचो कहाँ के कतै खोल्न दिन्नन् । ४

‘कहाँ जिन्दगीको सफा मूल फुट्छ-
कहाँ स्वच्छ सिद्धान्तको कोल घुम्छ ?’
‘कतै तथ्यताको सही विन्दु हुन्न,
कतै सत्यताको महासिन्धु हुन्न । ५

बढे दासका दास आशा सँगाली-
कुदे राष्ट्रको द्रोह गर्ने अँगाली,
छ सत्तासितै दस्युको घोलघाल-
म खै के सुनाऊँ नयाँ हालचाल ? ६

०००
चितवन