नेपाली हास्यव्यङ्ग्य अनलाइन पत्रिका

विनोद नेपाल :

‘प्रमुख अतिथि आउनुभयो !’
आयोजक संस्थाका अध्यक्ष खुशीले उफ्रिए मानौँ दुर्लभ कुनै चिज हात परेको होस् ।

एक घण्टा ढिलोगरी कार्यक्रम स्थलमा पुगेका प्रमुख अतिथि सरासर मन्चमा पुगे ।

आसन ग्रहणपछि सभापतिको आसनमा रहेका उनै अध्यक्ष र प्रमुख अतिथि बीच कानेखुसी चल्यो ।

कार्यक्रम प्रारम्भ भयो ।

सभापतिले उदघोषकलाई इशारा गरेर बोलाए र कानमा केही भने ।

फर्केर उदघोषकले भने ‘प्रमुख अतिथिज्यू अत्यन्त व्यस्त हुनुहुन्छ । व्यस्तताकै बीच पनि हाम्रो कार्यक्रममा उपस्थित भइदिनुभएकोमा उहाँप्रति हार्दिक आभार टक्रयाउँदै तुरुन्तै फर्कनुपर्ने भएकोले सम्बोधनका लागि उहाँलाई निम्त्याउँछु ।’

लामो समयदेखि उपस्थित आक्रोशित दर्शकहरूले एकै स्वरमा भने ‘लामो समय कुरियो, प्रमुख अतिथिको अनुहार हेरियो पुग्यो, उहाँको सम्बोधन सुन्ने फुर्सद हामीलाई छैन, हामी हिँड्यौँ ।’

हेर्दाहेर्दै हल खाली भयो । खाली हलको भित्तामा ठोक्किएको प्रमुख अतिथिको आवाज उनैतर्फ फर्किरहेको थियो ।

०००
पाल्पा, हाल काठमाडौं

इलस्ट्रेसन श्राेत : नागरिक दैनिक