नेपाली हास्यव्यङ्ग्य अनलाइन पत्रिका

विनोद नेपाल :

छिमेकीको घरमा रुवावासी सुनेपछि सबै त्यतैतिर दौडिए । गल्याङमल्याङ बढ्यो ।

‘हैन के भो, के भो ?’ सबै हतारिँदै प्रश्न गर्दैछन् तर जवाफ कतैबाट आउँदैन, सबै मौन छन् ।

हेर्दाहेर्दै भीड बढ्दै गयो । सबै जिज्ञासा राखिरहेछन्, जवाफ पाइरहेका छैनन् । भित्रबाट रुन्चे आवाज आइरहेकै छ, तर पहिले भन्दा कम हुँदै गएको छ ।

‘बुढाबुढीको झगडा हो जस्तो छ’, ‘भो लागौँ’ – मानिसहरू फर्कन थाले ।

यत्तिकैमा एउटी किशोरी रुन्चे अनुहार लिएर बाहिर निस्किन् र भनिन्’ कोरोनाको यत्रो त्रास छ, सरकारले भीड नगर्नु भनेको छ, हजूरहरु चाहिँ यस्तो भीड गर्ने ?’

‘रुवावासी सुनेर छिमेकीको धर्म निभाउन आएको’ ‘केही भयो कि भनेर आएका हामी’ – छिमेकीहरूले एकै स्वरमा भने ।

‘रुने को नि, तिमी नै हौ कि ?’- एउटाले सोध्यो ।

‘हो अंकल, मै हुँ रुने । परीक्षा सकेर मजाले घुमुँला भनेको अकस्मात स्थगित गरिदिँदा घुम्न जाने योजना बर्बाद भएकोले रोएकी नि ।’

छिमेकीहरू हाँस्दै फिर्ता भए ।

०००
पाल्पा, हाल वनस्थली, काठमाडौं