नेपाली हास्यव्यङ्ग्य अनलाइन पत्रिका

देव भट्टराई :

भत्केर जाऊन् घर खेतबारी ।
विदेशमा खोज्नुछ रोजगारी ॥
रोगी भई पाक्छ कपाल दारी ।
फर्किन्छु साठी म उमेर पारी ॥०१

छन् देश थाम्ने शिशु वृद्ध रोगी ।
भएन बालै ! थल होस् न जोगी ॥
सारा अरूका भरिए भकारी ।
रुँगेर बस्ने कति यो छहारी ?०२

त्यस्तो भयो ऊ अनि खै त तैले ?
कुवाक्य यस्ता कति सुन्नु मैले ?
जे पर्छपर्ला हिँडिहाल्छु दाजु ।
तान्नू मलाई पनि भन्छ राजु ॥०३

के काम तैले यतिको पढेको ?
छ प्रस्न साह्रै मुटुमा गढेको ॥
जानै पर्यो उत्तर खोज्न आजै ।
बिर्सूँ भनेँ तैपनि हुन्छ ताजै ॥०४

जहाजमा सर्र चढेर जान्छु ।
पढाइ गर्नेछु भनेर ढाँट्छु ॥
कमाउने दौलत लक्ष्य मेरो ।
संसार सारा अब मार्छु फेरो ॥०५

नेपाललाई गरिहाल्छु बाई ।
बन्नेछु प्यारो अनि हाइहाई ॥
समाजले भन्दछ पाठ घोकी ।
आयो फलानो यति गाँठ बोकी ॥०६

माजेर भाँडा बरु बस्छु हाँसी ।
यहाँ नहेर्ने अनुहार बासी ॥
गोरा र गोरी मृदु लाग्छ फेरि ।
को खान्छ आँटो ? छ अगाडि चेरी ॥०७

०००
भोजपुर