नेपाली हास्यव्यङ्ग्य अनलाइन पत्रिका

देव भट्टराई :

अतिको जति को ? बदनाम छ र ?
अतिले क्षति गर्छ भनिन्छ तर ॥
अतिबुद्धि भए कति हुन्छ मजा ?
अतिशान्ति भए छ कहाँ नमजा ?०१

अतिचार गरे अतिवाद धरे ।
शुभकार्य छली ढिलढाल गरे ॥
अनि पो अतिले क्षति गर्छ यहाँ ।
अपकर्म त पूजित हुन्छ कहाँ ?०२

अति हुन्न कहीँ मृदु प्रेम भरे ।
नव ज्ञान तथा नव बीज छरे ॥
जति नै पिरती गर हुन्न अति ।
जनजीवनमा न त गर्छ खती ॥ ०३

जलको अतिरूप समुद्र भयो ।
हिउँको अतिरूप हिमाल छ त्यो ॥
सबका प्रिय छन् दुइटै उतिकै ॥
मनमोहक छन् प्रियसी जतिकै ॥ ०४

अति ठाउँबिसे अति शक्तिबिसे ।
हुनसक्छ उही कम व्यक्तिबिसे ॥
कविले कविता अति लेख्न सके ।
कति हुन्छ मजा भनिसाध्य छ के ?०५

व्यवसाय गरे पनि थोक गरौँ ।
ढुकुटीसँगमा हरजेप भरौँ ॥
खुजुरा र झिना-मसिनापनले ।
यतिकै बितिहाल्छ कठै ! समय ॥०६

धरती जसरी दिनुपर्छ दिँदा ।
मधुमस्त खुशी लिनुपर्छ लिँदा ॥
खुद नग्न बनी पनि दिन्छ दिने ।
प्रिय छन् शिवजी अतिमा रङ्गिने ॥०७

०००
भोजपुर, हाल काठमाडौं