नेपाली हास्यव्यङ्ग्य अनलाइन पत्रिका

देव भट्टराई :

उनैको छ जत्था उनैको छ सत्ता ।
मिलाएर खान्छन् उनै वृद्धभत्ता ॥
उनै छन् भिखारी उनै छन् विचारी ।
उनै सर्वहारा उनै कर्मचारी ॥०१

पर्‍यो भाग हाम्रो यहाँ दुःख मात्र ।
सधैँ छाक टार्ने चटारो छ जात्रा ॥
छँदै छैन केही नयाँ खास राम्रो ।
बताऊ त्यहाँ के छ राम्रो नराम्रो ?०२

पुरानो छ माझी पुरानै छ डुङ्गा ।
कतिन्जेल पूजा गरी बस्नु ढुङ्गा ?
गरेको छ वाचा भनी पार तार्ने ।
छ यो चाल हेर्दा डुबाएर मार्ने ॥०३

कुनै छैन अर्को म तर्ने उपाय ।
बसेको छु काम्दै भनी हाय-हाय !!
भरोसा कसैको नगर्दा हुने भो ।
दुखी-दीनलाई मयाले छुने को ?०४

बसेको छ उग्राउदै साँढ राहु ।
उता स्याल भन्दैछ झर्ला र खाऊँ ॥
मलाई छ शङ्का वितण्डा हुनेमा ।
ल है ! लाम लागौं कराई रुँने भा ॥०५

०००
काठमाडौं