नेपाली हास्यव्यङ्ग्य अनलाइन पत्रिका

देव भट्टराई :

केही उपाय नचलेपछि बन्छ नेता ।
राख्छन् अचम्मसँगले जनता अपेक्षा ॥
साक्षी हुँदैछ बिचरो ! दुधको बिरालो ।
मौका मिलेपछि कहाँ ? कुरिबस्छ पालो ॥०१

देखिन्छ दोष कसको ? भन मित्र आफैँ ।
पाली नराख दुविधा मनभित्र आफैँ ॥
जे सत्य हो समयले गरिहाल्छ प्रष्ट ।
पानी र तेल छुटिएसरि छुट्छ भ्रष्ट ॥०२

रोपेर झार कसरी तुलसी म पाऊँ ?
पाखण्डको भजन त्यो कसरी म गाऊँ ?
हो लोकतन्त्र जनता बहुमूल्य हुन्छन् ।
सोचेर भोट नगरे नकटा चुनिन्छन् ॥०३

पाको र स्वच्छ नभई व्यवहार हाम्रो ।
होला र के ? असलमा घरबार राम्रो ॥
अर्को उपाय गतिलो अब छैन साथी ।
जाने कहाँ ? भन तिमी तल या त माथि ?०४

फल्नेछ शुद्ध बिउले फलफूल मीठो ।
आफैँ विकारित हुँदा फल हुन्न मीठो ॥
ज्ञानी र शिक्षित भए जनता स्वयंमा ।
नेता हुँदैन नकली सकली स्वयंमा ॥०५

फुल्छन् अनेक तरु ती मधुमासभित्र ।
पत्ता लगाउँन सके छ सुधा पवित्र ॥
हेरी चरित्र पहिले पछि छान नेता ।
बन्दैन भोट नदिए गँगटो विजेता ॥०६

०००
भोजपुर, हाल काठमाडौं