नेपाली हास्यव्यङ्ग्य अनलाइन पत्रिका

पदम दाहाल :

अरू छ को र मातृका समान यो धराभरि
पवित्र धाम रे मुमा अजस्र हौ सुनाखरी ।
बढाउने पढाउने प्रयास हौ सुशासन
समस्त मातृ शक्तिमा हजार लाख वन्दना ।१।

विशेष भन्न भ्याइनन् बिराम भन्न पाइनन्‌
थकान भुल्न चाहिनन् उदास सुम्सुम्याइनन् ।
नितान्त फूल केँवरा अपूर्व लाग्छ जन्मना
समस्त मातृ शक्तिमा हजार लाख वन्दना ।२।

मिलाप मेलमा गुनी उदार मोह हौ तिमी
अनेक कष्ट झेल्नमा सुयोग्य पात्र हौ तिमी ।
जियाउने तरान हौ निसाफ न्याय गर्नमा
समस्त मातृ शक्तिमा हजार लाख वन्दना ! ।३।

हियारभित्र वास होस् सियाँल वृक्ष बोट हौ
अनन्त पुष्पवाटिका बनेर मुस्कुराउँछ्यौ ।
सदैव भक्ति भावना बगोस् छ दिव्य कामना
समस्त मातृ शक्तिमा हजार लाख वन्दना ! ।४।

धरा धराप हुन्छ यो मुमा नभैदिएपछि
सधाउँछिन् र नै उनी सुपात्र बन्छ सारथि ।
गृहस्थ खुल्छ शिल्पले रहन्न व्यग्र उल्झन
समस्त मातृ शक्तिमा हजार लाख वन्दना ! ।५।

०००
मादी न.पा. ६, सङ्खुवासभा
हालः लोकन्थली, भक्तपुर ।