नेपाली हास्यव्यङ्ग्य अनलाइन पत्रिका

पदम दाहाल :

धेरै नै सुख शान्ति हर्ष हरिए भोग्यौँ कि कहर
बेरेझैँ लहरा लता खुब मिली ढाले कि फँडिर ?
खै त्यस्तो किन भो अशान्ति त्यसरी क्रोधाग्नि खनियो
आयो वर्ष नयाँ कुँदेर सपना चाखेर अमिलो । ।१।

भाग्यै पो कमजोर हो कि जनता रक्ताम्य बनियो
कस्तो त्यो असबाफ भाद्र महिना लाग्दैन गुनिलो ।
सास्ती साल भएछ खेदिनु थियो खोटो अगतिलो
आयो वर्ष नयाँ कुँदेर सपना चाखेर अमिलो । ।२।

आगामी दिन रौद्र खेप्नु नपरोस् उत्पात तपनी
गाना गीत सहर्ष गाउन मिलोस् सौगात रहनी !
निस्ताए किन द्वारपाल दल ती लाग्यो कि धमिरो ?
आयो वर्ष नयाँ कुँदेर सपना चाखेर अमिलो । ।३।

वृद्धावृद्ध रमून् वसन्त ऋतुले पार्नै छ रसिलो
उल्कापात नहोस् प्रभात नगरी खोज्नै छ खँदिलो ।
जोडोस् जीर्ण असक्तमाथि करुणा पारेर कसिलो
आयो वर्ष नयाँ कुँदेर सपना चाखेर अमिलो । ।४।

दुःखी हाँस्न सकून् समस्त जन ती खोलेर नयन
निस्तो मेट्न सकून् प्रशस्त श्रमले चालेर कदम ।
खाका सुन्दर हुन् बदल्न नसके होला कि अधुरो ?
आयो वर्ष नयाँ कुँदेर सपना चाखेर अमिलो । ।५।

०००
मादी न.पा. ६, सङ्खुवासभा
हालः लोकन्थली, भक्तपुर ।
९८४२०९९८३१