नेपाली हास्यव्यङ्ग्य अनलाइन पत्रिका

पदम दाहाल :

सिक्सिको लाग्दछन् मान्छे खट्पटाउँछ यो मन
फिट्फिटाएर बाँच्तैछु भत्भताउँछ जीवन । ।१।

देखेर सुख अर्काको मान्छे मर्छ जलीकन
फलानाको छ रे दुःख भन्दा दुख्छ र सज्जन ? ।२।

आफँै सुक्सुक भोग्दैछु सिक्सिको लाग्छ मानिस
सैतान हो कि मान्छे ऊ ? हदै गर्दछ आरिस । ।३।

दायित्वबोध नै छैन भित्र दिग्ग्रान्त मालिक
सच्चा साधक हो के ऊ ? देख्तै धर्म निवारक । ।४।

धर्मभित्र बिलो बाँडो सिक्सिको छ जलाम्मय
मर्मबेगरको कर्म मान्छे लाग्दैन चिन्मय । ।५।

धर्म भित्रै छ रे सर्म दाह्रीकेश पलाउँछन्‌
झुसिल्किरा, झिँगा, पाहा जस्ता भै अथुलाउँछन् । ।६।

मान्छे हुन् तर बिन्दास सिक्सिकोमय सोच छन्
काल दलाल झोले हुन् चिल्ला चौपट्ट ओठ छन् । ।७।

राल काढेर अर्काको हालीमुहाली खोज्छ ऊ
सिक्सिकै सिक्सिको लाग्दो मझेरीनिर पुग्छ ऊ । ।८।

जन्मभूमि थलो त्यागी बिर्सी बेगिन्छ रे पर
पुग्छ मानिस टाढा ऊ सिक्सिकै छ कि यो घर ? ।९।

घिड्घिडो मनको धोको धाकिलो छ सदाभर
सिक्सिको नखपोस् कोही जस्ले पार्नेछ दुर्बल । ।१०।

०००
मादी न.पा. ६, सङ्खुवासभा
हालः लोकन्थली, भक्तपुर ।